میکسیکو میں مذہبی تہوار کے دوران آتش بازی کے سامان میں دھماکے کے نتیجے میں کم از کم 10 افراد ہلاک اور 64 زخمی ہوگئے۔
این بی سی نیوز کے مطابق دھماکا وسطی میکسیکو کی میونسپلٹی تیماسکال سینگو میں واقع نوئسترا سینیورا دے لا لوز چرچ کے قریب ہفتے کی رات اس وقت ہوا جب سینکڑوں افراد مذہبی تہوار کے سلسلے میں آتش بازی دیکھنے کے لیے جمع تھے دھماکا چرچ کے قریب اس مقام پر ہوا جہاں مذہبی رسومات جاری تھیں، دھماکے کے بعد ایک دیوار منہدم ہوگئی جبکہ چرچ اور تہوار کے لیے نصب کی گئی تفریحی جھولوں اور دیگر کارنیول سواریوں کو بھی نقصان پہنچا۔
دھماکے کے بعد علاقے میں دھواں اور ملبہ پھیل گیا،زخمیوں کو فوری طور پر قریبی اسپتالوں اور طبی مراکز منتقل کیا گیا۔ مقامی بشپ کے مطابق زخمی ہونے والوں میں دو پادری بھی شامل ہیں، دھماکے کی حتمی وجہ تاحال معلوم نہیں ہوسکی، تاہم میکسیکو کے ریاستی اٹارنی جنرل کے دفتر نے واقعے کی تحقیقات شروع کردی ہیں تاکہ دھماکے کے اسباب اور ذمہ داری کا تعین کیا جاسکے۔
تیماسکال سینگو میکسیکو سٹی سے تقریباً 160 کلومیٹر شمال مغرب میں واقع ہے اور اس کی آبادی تقریباً 66 ہزار ہے مذہبی تہواروں اور عوامی تقریبات میں آتش بازی کا استعمال میکسیکو میں عام ہے، تاہم آتش بازی کے سامان سے ہونے والے حادثات ماضی میں بھی جانی نقصان کا سبب بن چکے ہیں، تقریباً چار سال قبل وسطی ریاست ہیدالگو کی میونسپلٹی ہوئیوتلا کے ایک گاؤں میں بھی آتش بازی کے سامان میں زور دار دھماکا ہوا تھا، جس کے نتیجے میں 17 افراد زخمی ہوئے تھے۔