مسلم لیگ ن کے اہم اجلاس میں آزاد کشمیر کے نئے وزیراعظم کے نام پر حتمی فیصلہ کرلیا گیا، تاہم امیدوار کے نام کا باقاعدہ اعلان آج کیا جائے گا۔
ذرائع کے مطابق مری میں ہونے والے اجلاس کی صدارت مسلم لیگ ن کے صدر اور سابق وزیراعظم نواز شریف نے کی، جس میں وزیراعظم شہباز شریف، وزیراعلیٰ پنجاب مریم نواز سمیت پارٹی کے دیگر اعلیٰ رہنماؤں نے شرکت کی،اجلاس میں آزاد کشمیر کی وزارت عظمیٰ کے لیے پارٹی کے صدر شاہ غلام قادر اور طارق فاروق کے نام مضبوط امیدواروں کے طور پر زیر غور رہے۔
ذرائع نے بتایا کہ اجلاس میں مختلف نشستوں پر نامزدگیوں کے حوالے سے بھی مشاورت مکمل کرلی گئی ہے،مخصوص نشستوں کے لیے سحرش قمر، مریم کشمیری، ناصرہ خان اور نثارہ عباسی کے نام زیر غور آئے، جبکہ اوورسیز نشست کے لیے حاجی احسان دانش، عبدالرحمان آرائیں اور راجا وسیم کے ناموں پر غور کیا گیا۔
مسلم لیگ ن کی قیادت نے تمام معاملات پر مشاورت مکمل کرلی ہے اور آزاد کشمیر کے وزیراعظم سمیت دیگر نامزدگیوں کا اعلان آج کیا جائے گا،اجلاس کے اختتام پر نواز شریف اور مریم نواز لاہور روانہ ہوگئے ہیں، ذرائع کا کہنا ہے کہ نواز شریف خود آزاد کشمیر کے وزیراعظم اور دیگر نشستوں کے لیے پارٹی امیدواروں کے ناموں کا اعلان کریں گے۔