مظفرآباد: وزیراعظم آزاد کشمیر افتخار گیلانی نے حکومت کے پہلے اجلاس میں 100 روزہ اصلاحاتی ایجنڈے پر فوری عملدرآمد کا اعلان کرتے ہوئے بیوروکریسی کو عوامی ریلیف کے لیے عملی اقدامات تیز کرنے کی ہدایت کردی۔
وزیراعظم افتخار گیلانی کی زیر صدارت وزیراعظم سیکرٹریٹ میں سیکرٹریز حکومت کا اجلاس ہوا، جس میں چیف سیکرٹری آزاد کشمیر خوشحال خان، ایڈیشنل چیف سیکرٹری جنرل ظہیر الدین قریشی، سینئر ممبر بورڈ آف ریونیو سردار محمد ظفر، پرنسپل سیکرٹری سردار عدنان خورشید سمیت مختلف محکموں کے سیکرٹریز نے شرکت کی۔
اجلاس میں وزیراعظم نے ہدایت کی کہ عام آدمی کو فوری ریلیف کی فراہمی، روزگار کے نئے مواقع پیدا کرنے، نوجوانوں کے لیے خصوصی پروگرام شروع کرنے اور صحت و سفری سہولیات میں بہتری کے لیے ٹھوس اقدامات کیے جائیں۔ انہوں نے واضح کیا کہ حکومتی کارکردگی صرف اعلانات اور کاغذی کارروائی تک محدود نہیں رہنی چاہیے بلکہ اصلاحاتی اقدامات کے نتائج عملی طور پر زمینی سطح پر نظر آنے چاہئیں۔
افتخار گیلانی نے کہا کہ عام آدمی کی مشکلات کم کرنا حکومت کی اولین ترجیح ہے، جبکہ آزاد کشمیر میں بے روزگاری ایک بڑا چیلنج ہے جس سے نمٹنے کے لیے نوجوانوں کو معاشی سرگرمیوں کا حصہ بنانے پر خصوصی توجہ دی جائے گی۔ اس مقصد کے لیے نوجوانوں کے لیے خصوصی پروگرام شروع کرنے کے ساتھ ساتھ طلب اور مارکیٹ کی ضروریات کو مدنظر رکھتے ہوئے ہنرمند پروگرام بھی متعارف کرایا جائے گا، تاکہ نوجوانوں کو قابلِ روزگار ہنر فراہم کرکے روزگار کے نئے مواقع پیدا کیے جا سکیں۔
وزیراعظم نے بنیادی عوامی سہولیات کی بہتری پر بھی زور دیتے ہوئے کہا کہ صحت، سفری سہولیات اور دیگر بنیادی خدمات کو بہتر بنانے کے لیے ترجیحی بنیادوں پر اقدامات کیے جائیں گے۔ حکومت اور انتظامیہ باہمی تعاون اور ٹیم ورک کے ذریعے عوامی مسائل کے حل کے لیے کام کریں گے۔
انہوں نے واضح کیا کہ 100 روزہ اصلاحاتی ایجنڈا حکومت کی ترجیحات کا واضح روڈ میپ ہے، جس کا مقصد آزاد کشمیر میں گڈ گورننس کو فروغ دینا، عوامی سہولیات بہتر بنانا اور شہریوں کے لیے معاشی مواقع پیدا کرنا ہے۔ وزیراعظم نے متعلقہ محکموں کو ہدایت کی کہ اصلاحاتی ایجنڈے پر فوری عملدرآمد کو یقینی بنایا جائے اور مقررہ اہداف کے حصول کے لیے مؤثر اقدامات کیے جائیں۔