بیوروکریسی احتساب سے محفوظ اور ناقابلِ گرفت رہی۔خواجہ آصف

اسلام آباد: وزیر دفاع خواجہ آصف نے کہا ہے کہ پاکستان میں حکمران اشرافیہ کے تقریباً ہر طبقے کو اپنے اقدامات کی قیمت چکانا پڑی، جبکہ کرپشن، بدانتظامی اور دیگر الزامات پر حکمران اشرافیہ کے خلاف کارروائیاں بھی ہوتی رہی ہیں، تاہم صرف بیوروکریسی احتساب سے محفوظ اور ناقابلِ گرفت رہی۔

خواجہ آصف کا کہنا تھا کہ پاکستانیوں کو شاید ہی اس بات کا احساس ہے کہ ملک پر بیوروکریٹس بھی حکمرانی کرتے رہے ہیں۔ سابق گورنر جنرل غلام محمد بیوروکریٹ تھے، سابق وزیراعظم چوہدری محمد علی بھی بیوروکریٹ تھے، جبکہ سابق صدور سکندر مرزا اور غلام اسحاق خان کا تعلق بھی بیوروکریسی سے تھا۔وزیر دفاع نے کہا کہ یہ سب کچھ ایسے وقت میں ہوا جب بظاہر ملک کا اقتدار سیاستدانوں کے پاس تھا۔ ان کے مطابق بیوروکریٹس کو تمام معاملات کا موردِ الزام نہیں ٹھہرایا جا سکتا، کیونکہ سیاستدانوں کی نااہلی، باہمی اختلافات اور کمزوریوں نے بیوروکریسی کو فیصلہ سازی میں زیادہ جگہ فراہم کی۔خواجہ آصف نے کہا کہ اگر سیاستدان اپنی اصلاح کرلیں، اپنی ذمہ داریاں مؤثر انداز میں ادا کریں اور باہمی اختلافات ختم کریں تو بیوروکریسی میں بھی خود بخود اصلاح اور احتساب کا عمل شروع ہوجائے گا۔