راولپنڈی کے اڈیالہ روڈ پر بس کی موٹر سائیکل کو ٹکر کے نتیجے میں والد کے ساتھ بیٹھی 9 سالہ کمسن بچی جاں بحق ہوگئی، جبکہ موٹر سائیکل سوار والد اور دوسری بچی محفوظ رہے۔
پولیس کے مطابق افسوسناک حادثہ اڈیالہ روڈ پر منور کالونی کے قریب ایک نجی مارٹ کے سامنے پیش آیا، جہاں ایک بس نے موٹر سائیکل کو ٹکر مار دی۔ حادثے کے نتیجے میں موٹر سائیکل پر والد کے ساتھ بیٹھی 9 سالہ عائشہ شدید زخمی ہوئی اور موقع پر ہی جاں بحق ہوگئی۔ بچی کا سر بس کے نیچے آکر کچلا گیا، جبکہ اس کا والد اور دوسری کمسن بچی محفوظ رہے۔
حادثے کی اطلاع ملتے ہی پولیس موقع پر پہنچ گئی اور بس کے ڈرائیور کو مشتعل شہریوں سے اپنی تحویل میں لے لیا۔ کمسن بچی کی ہلاکت پر علاقہ مکین مشتعل ہوگئے اور اڈیالہ روڈ پر احتجاج شروع کردیا۔
مشتعل افراد نے بس پر پتھراؤ کیا اور اسے نذرِ آتش کرنے کی کوشش بھی کی۔ پولیس نے بروقت کارروائی کرتے ہوئے بس کو آگ لگانے کی کوشش ناکام بنادی اور احتجاج میں ملوث 10 افراد کو حراست میں لے لیا۔