امریکا کی ریاست واشنگٹن میں ایک فیکٹری میں کیمیکل ٹینک پھٹنے سے متعدد افراد ہلاک اور 10 زخمی ہو گئے جبکہ کئی افراد تاحال لاپتا ہیں۔
غیر ملکی خبر ایجنسی روئٹرز کے مطابق حادثہ منگل کی صبح نِپون ڈائناویو پیکیجنگ کمپنی کی فیکٹری میں پیش آیا جہاں “وائٹ لِکر” نامی کیمیائی محلول سے بھرا ایک بڑا ٹینک اچانک اندرونی دباؤ کے باعث پھٹ گیا۔
حکام کے مطابق دھماکا مقامی وقت کے مطابق صبح تقریباً 7 بج کر 15 منٹ پر ہوا۔
رپورٹس کے مطابق ابتدائی طور پر خیال کیا گیا کہ ٹینک میں تقریباً 80 ہزار گیلن کیمیکل موجود تھا، تاہم بعد میں معلوم ہوا کہ اس میں تقریباً 9 لاکھ گیلن خطرناک محلول بھرا ہوا تھا۔
یہ کیمیائی محلول سوڈیم ہائیڈرو آکسائیڈ اور سوڈیم سلفائیڈ پر مشتمل ہوتا ہے اور کاغذی گودا تیار کرنے کے عمل میں استعمال کیا جاتا ہے۔
لانگ ویو فائر ڈیپارٹمنٹ کے حکام کے مطابق دھماکے کے بعد فیکٹری کا بڑا حصہ متاثر ہوا جبکہ امدادی کارروائیوں کے دوران کئی افراد کیمیکل سے جھلسنے کا شکار بھی ہوئے۔
بٹالین چیف میٹ ایموس نے بتایا کہ زخمیوں میں فیکٹری کے 8 ملازمین اور ایک فائر فائٹر شامل ہیں جبکہ بعض زخمیوں کی حالت تشویشناک بتائی جا رہی ہے۔
انہوں نے کہا کہ دھماکے کے بعد ٹینک اب بھی غیر مستحکم حالت میں ہے جس کے باعث ریسکیو اور بحالی کی کارروائیاں احتیاط کے ساتھ جاری رکھی جا رہی ہیں۔
حکام کے مطابق واقعے میں متعدد ہلاکتوں کی تصدیق ہوئی ہے تاہم مرنے والوں کی حتمی تعداد تاحال جاری نہیں کی گئی۔
ریاست واشنگٹن کے گورنر باب فرگوسن نے متاثرہ خاندانوں سے اظہار ہمدردی کرتے ہوئے کہا کہ یہ ایک انتہائی افسوسناک سانحہ ہے اور ریاستی ادارے مکمل تحقیقات کریں گے۔
واقعہ شہر لانگ ویو میں پیش آیا جو امریکی شہر پورٹلینڈ سے تقریباً 72 کلومیٹر شمال میں واقع ہے۔
ماہرین کے مطابق صنعتی کیمیکل ٹینکس میں حفاظتی انتظامات کی معمولی غفلت بھی بڑے سانحات کا سبب بن سکتی ہے۔
واشنگٹن میں کیمیکل ٹینک دھماکا، متعدد ہلاک و زخمی
