وزیراعلیٰ پنجاب مریم نواز شریف سے اسپیکر پنجاب اسمبلی ملک محمد احمد خان نے ملاقات کی، جس میں ملکی و عالمی صورتحال، صوبے میں قانون سازی، جیل اصلاحات اور پنجاب اسمبلی کی کارروائی کو باہمی تعاون سے آگے بڑھانے سمیت مختلف امور پر تبادلہ خیال کیا گیا۔
ملاقات کے دوران پنجاب اسمبلی کی کارروائی کو باہمی ہم آہنگی اور تعاون کے ساتھ مؤثر بنانے پر اتفاق کیا گیا دونوں رہنماؤں نے صوبے میں قانون سازی کے عمل کو مزید بہتر بنانے اور اہم عوامی معاملات پر مشاورت جاری رکھنے کے عزم کا اظہار کیا۔
اس موقع پر جیل اصلاحات کے لیے قانون سازی کے امور پر بھی تبادلہ خیال کیا گیا، وزیراعلیٰ مریم نواز شریف نے اسپیکر پنجاب اسمبلی کو ہدایت کی کہ حکومتی اور اپوزیشن اراکین کو قانون سازی کے عمل میں مؤثر طور پر شامل کیا جائے تاکہ اسمبلی کا کردار مزید مضبوط ہو۔
ملاقات کے دوران اسپیکر پنجاب اسمبلی ملک محمد احمد خان نے نیشنل پیغام امن کمیٹی میں وزیراعلیٰ مریم نواز شریف کی جانب سے پیش کی گئی پالیسی کو سراہتے ہوئے اسے قابلِ تحسین قرار دیا انہوں نے وزیراعلیٰ کو ’اپنا کھیت، اپنا روزگار‘ اسکیم کے کامیاب اجرا اور قرعہ اندازی پر مبارکباد بھی پیش کی۔
مریم نواز شریف نے کہا کہ ’اپنا کھیت، اپنا روزگار‘ اسکیم پوری ٹیم کی مشترکہ کامیابی ہے۔ انہوں نے کہا کہ پنجاب میں عوامی فلاح و بہبود کے لیے ہر روز نئے منصوبے شروع کیے جا رہے ہیں حکومت کی توجہ اب صوبے کے پسماندہ علاقوں کی ترقی پر مرکوز ہے، جہاں سڑکوں پر الیکٹرک بسیں چلانے اور شعبہ زراعت میں جدید مشینری متعارف کرانے کے منصوبے جاری ہیں ’اپنا کھیت، اپنا روزگار‘ اسکیم کے ذریعے 30 ہزار بے روزگار خاندانوں کو زمین اور روز گار کے مواقع فراہم کیے گئے ہیں، جس سے دیہی معیشت کو مضبوط بنانے میں مدد ملے گی۔
اسپیکر پنجاب اسمبلی ملک محمد احمد خان نے صوبائی حکومت کے عوامی منصوبوں اور ترقیاتی اقدامات کو بھی سراہا اور اس عزم کا اظہار کیا کہ پنجاب اسمبلی قانون سازی کے عمل میں اپنا مؤثر کردار ادا کرتی رہے گی۔