گوجرانوالہ: جیل سے عدالت لائے گئے دو خطرناک قیدیوں کے فرار کے 10 سال پرانے مقدمے کا فیصلہ سنا دیا گیا، جس میں اینٹی کرپشن کی اسپیشل کورٹ نے دو پولیس اہلکاروں کو 6، 6 سال جبکہ قیدی وین کے ڈرائیور کو 12 سال قید کی سزا سنائی ہے۔
اسپیشل کورٹ کے جج نے مقدمے کا فیصلہ سناتے ہوئے پولیس کے اے ایس آئی نوازش علی اور کانسٹیبل بشیر احمد کو چھ، چھ سال قید اور ایک، ایک لاکھ 50 ہزار روپے جرمانے کی سزا سنائی۔ عدالت نے قیدی وین کے ڈرائیور کو غفلت اور ذمہ داری پوری نہ کرنے پر 12 سال قید کا حکم بھی دیا۔
یہ مقدمہ 30 مئی 2016 کو تھانہ سول لائن میں درج کیا گیا تھا۔ استغاثہ کے مطابق دو قیدیوں کو جیل سے ضلع کچہری میں پیشی کے لیے قیدی وین کے ذریعے لایا گیا تھا۔ عدالت کے باہر پہلے سے موجود ملزمان کے ساتھیوں نے پولیس اہلکاروں کو نشہ آور جوس پلا دیا، جس کے باعث اہلکار بے ہوش ہوگئے اور دونوں قیدی موقع سے فرار ہونے میں کامیاب ہو گئے۔
تحقیقات میں یہ بات سامنے آئی کہ فرار ہونے والے دونوں ملزمان قتل اور دہشت گردی جیسے سنگین مقدمات میں گرفتار تھے، جن کے فرار نے اس وقت سکیورٹی انتظامات پر بھی کئی سوالات کھڑے کیے تھے۔
طویل قانونی کارروائی اور شواہد کا جائزہ لینے کے بعد عدالت نے ذمہ دار اہلکاروں کو قصوروار قرار دیتے ہوئے سزائیں سنائیں۔ فیصلے کو قانون نافذ کرنے والے اداروں میں غفلت اور فرائض میں کوتاہی کے خلاف ایک اہم عدالتی اقدام قرار دیا جا رہا ہے۔
10 سال پرانے قیدی فرار کیس کا فیصلہ، 2 پولیس اہلکاروں کو 6، 6 سال جبکہ ڈرائیور کو 12 سال قید
