آزاد کشمیر الیکشن کمیشن نے قانون ساز اسمبلی کے عام انتخابات کی تاریخ کا اعلان کرتے ہوئے کہا ہے کہ انتخابات 27 جولائی 2026 کو منعقد ہوں گے۔
امیدوار 9 جون سے 19 جون تک کاغذاتِ نامزدگی جمع کرا سکیں گے۔کاغذاتِ نامزدگی کی جانچ پڑتال 20 جون کو ہوگی۔درست نامزد امیدواروں کی فہرست 20 جون کو جاری کی جائے گی۔نامزدگی مسترد ہونے کے خلاف اپیلیں 21 سے 24 جون تک دائر کی جا سکیں گی۔الیکشن کمیشن اپیلوں کی سماعت 26 اور 27 جون کو کرے گا،اپیلوں پر فیصلے 28 اور 29 جون کو سنائے جائیں گے۔امیدوار 30 جون تک کاغذاتِ نامزدگی واپس لے سکیں گے۔انتخابی میدان میں موجود امیدواروں کی فہرست یکم جولائی کو جاری ہوگی۔امیدواروں کو انتخابی نشانات 2 جولائی کو الاٹ کیے جائیں گے۔حتمی فہرستِ امیدواران اور انتخابی نشانات 2 جولائی کو جاری ہوں گے۔آزاد کشمیر میں پولنگ 27 جولائی کو صبح 8 بجے سے شام 5 بجے تک ہوگی۔الیکشن کمیشن نے انتخابی شیڈول کے نفاذ کا فوری اعلان کر دیا۔عام انتخابات کے انعقاد کے لیے ریٹرننگ افسران کو شیڈول کے مطابق کارروائی کی ہدایت کی گئی ہے،آزاد کشمیر میں انتخابی سرگرمیوں کا باقاعدہ آغاز، الیکشن شیڈول نافذ کر دیا گیا،نوٹیفکیشن کے مطابق پولنگ 27 جولائی 2026 کو مقرر کی گئی ہے جبکہ کاغذاتِ نامزدگی 9 تا 19 جون وصول کیے جائیں گے
الیکشن کمیشن کے اعلان کے بعد سیاسی سرگرمیوں میں تیزی آنے کا امکان ہے جبکہ مختلف سیاسی جماعتوں نے انتخابی مہم کی تیاریوں کا آغاز بھی کر دیا ہے۔یاد رہے کہ گزشتہ روز آزاد کشمیر قانون ساز اسمبلی نے کشمیری مہاجرین کی 12 نشستیں برقرار رکھنے سے متعلق ایک اہم قرارداد منظور کی تھی۔ قرارداد میں کہا گیا کہ مہاجرین کی نمائندگی ایک تاریخی اور آئینی حقیقت ہے جسے برقرار رکھا جانا چاہیے۔منظور شدہ قرارداد کے مطابق انتخابی نظام سے متعلق پیچیدگیوں کے خاتمے اور سیاسی جماعتوں کے لیے قابل قبول اصلاحات متعارف کرانے کے لیے ضروری قانون سازی اسمبلی کے ذریعے عمل میں لائی جا سکتی ہے۔قرارداد میں مزید کہا گیا کہ آئینی اصلاحات عوام کے منتخب نمائندوں کا خصوصی اختیار اور مینڈیٹ ہیں، اس لیے اصلاحات کا معاملہ قانون ساز اسمبلی پر چھوڑا جائے۔ قرارداد میں سیاسی جماعتوں، بار ایسوسی ایشنز، بار کونسل، سول سوسائٹی اور آئینی ماہرین سے مشاورت کی بھی سفارش کی گئی ہے۔
سیاسی حلقوں کے مطابق انتخابات کی تاریخ کے اعلان کے بعد آزاد کشمیر میں انتخابی ماحول مزید گرم ہونے کا امکان ہے اور مختلف جماعتیں عوامی حمایت حاصل کرنے کے لیے اپنی سرگرمیوں میں اضافہ کریں گی۔