بھارتی ریاست اتر پردیش کے شہر کانپور میں سی سی ٹی وی کیمروں کے ذریعے مسلسل نگرانی اور رات گئے پارٹیوں پر سسر کے اعتراضات سے مبینہ طور پر تنگ بہو نے اپنے سسر کو قتل کروا دیا۔
بھارتی میڈیا کے مطابق 63 سالہ فارماسیوٹیکل تاجر وینیت مینوچا اپنے فلیٹ میں مردہ پائے گئے۔ پولیس نے سی سی ٹی وی فوٹیج کا جائزہ لیا تو شک خاندان کے سابق ملازم وشال اور اس کے ساتھی راج کشور پر گیا، جنہیں گرفتار کر لیا گیا۔
تفتیش میں اس وقت اہم پیش رفت ہوئی جب وشال نے مبینہ طور پر انکشاف کیا کہ قتل وینیت مینوچا کی 36 سالہ بہو شالو کے کہنے پر کیا گیا۔ اس کے مطابق شالو نے اسے قتل کے عوض رقم دینے کا وعدہ کیا تھا، جس کے بعد پولیس نے بہو کو بھی تحویل میں لے لیا۔
تفتیش کاروں کے مطابق شالو نے ابتدائی طور پر پولیس کو گمراہ کرنے کی کوشش کی، تاہم بعد ازاں پوچھ گچھ کے دوران مبینہ طور پر اپنے ملوث ہونے کا اعتراف کیا۔ شالو نے تفتیش کے دوران بتایا کہ اس کا سسر گھر کے اندر ہونے والی سرگرمیوں پر سی سی ٹی وی کیمروں کے ذریعے کڑی نظر رکھتا تھا اور اس کے رات گئے پارٹیوں میں جانے یا دیر سے گھر واپس آنے پر اعتراض کرتا تھا۔
پولیس کے مطابق شالو نے یہ بھی بتایا کہ ایک امیر خاندان سے تعلق رکھنے کے باوجود گھر کے اخراجات پر اس کا اختیار نہیں تھا اور اسے اپنے اور شوہر کے معمولی اخراجات کے لیے بھی سسر سے رقم مانگنا پڑتی تھی۔
تفتیش کاروں کا الزام ہے کہ شالو نے سسر کو قتل کرنے کے لیے 6 لاکھ روپے کی پیشکش کی۔ مبینہ طور پر اس نے فلیٹ کی ڈپلیکیٹ چابی حاصل کرکے وشال کے حوالے کی۔ پولیس کے مطابق 4 ستمبر کو شالو نے کچھ اشیا دینے کے بہانے وشال کو بلایا، جہاں مبینہ طور پر قتل کے منصوبے کو حتمی شکل دی گئی۔
پولیس مقتول کے بیٹے سبرت کے کال ریکارڈز کا بھی جائزہ لے رہی ہے تاکہ یہ معلوم کیا جا سکے کہ آیا اسے مبینہ سازش کا علم تھا یا وہ کسی بھی طرح قتل میں ملوث تھا۔