اوکاڑہ (نامہ نگار ملک ظفر)معاون خصوصی وزیراعلیٰ برائے فوڈ سیفٹی اینڈ کنزیومر پروٹیکشن پنجاب سلمہ بٹ کی زیر صدارت ڈی سی آفس میں اعلیٰ سطحی اجلاس، اجلاس میں ایم این اے چوہدری ریاض الحق جج اور ڈی سی محمد اکرام ملک سمیت ضلعی افسران اور انجمن غلہ منڈی و سبزی منڈی کے نمائندوں نے بھی شرکت کی۔ ڈپٹی کمشنر محمد اکرام ملک نے پرانی غلہ و سبزی منڈی اور منڈیوں کی نئی جگہ منتقلی پر تفصیلی بریفنگ دی اور ضلع پرائس کنٹرول میکانزم اور فوڈ سیفٹی اقدامات پر عملدرآمد بارے بھی آگاہ کیا۔ ایم این اے چوہدری ریاض الحق جج نے عوامی سہولت کے پیش نظر منڈیوں کی جلد منتقلی بارے تجاویز دیں۔ اس موقع پر غلہ و سبزی منڈی کے عہدہ داران کی منتقلی کے ورکنگ پلان میں متعلقہ اداروں کو آن بورڈ لینے کے سلسلہ میں گذارشات پیش کیں۔ معاون خصوصی وزیراعلیٰ سلمہ بٹ نے پرانی غلہ و سبزی منڈی اور نئی منڈیوں کی سائٹس کا بھی دورہ کیا۔ انہوں نے کہا کہ وزیراعلیٰ پنجاب ہر شعبہ میں عوامی ریلیف کے لیے عملی اقدامات کر رہی ہیں۔ عوامی ریلیف اور مستقبل کی ضروریات کو مدنظر رکھتے ہوئے نئی سبزی و غلہ منڈیوں کا قیام از حد ضروری ہے۔ نئی منڈیوں میں بہتر ماحول فراہم کر کے کاروباری افراد کو بہترین ماحول فراہم کیا جائے گا۔ موجودہ دور میں پنجاب بھر میں منڈیوں کی تعداد میں اضافے سے اشیاء کی سپلائی میں واضح بہتری آئی ہے۔ معاون خصوصی وزیراعلیٰ سلمہ بٹ نے کہا کہ پرائس کنٹرول میکانزم میں اشیائے خورونوش کی قیمتوں کا درست تعین از حد ضروری ہے۔ اشیاء کی قیمتوں کے درست تعین کے مطابق انفورسمنٹ افسران فیلڈ میں سخت کاروائیاں کریں۔ مصنوعی مہنگائی کے مرتکب افراد کو جرمانوں کے ساتھ ان کی دکانیں سیل کی جائیں۔ آٹے کی سپلائی میں بہتری کے لیے ورکنگ پلان بنا کر بھجوایا جائے۔ معاون خصوصی وزیراعلیٰ پنجاب سلمہ بٹ اور ایم این اے چوہدری ریاض الحق جج نے شجرکاری مہم کے تحت نے ڈی سی لان میں پودے بھی لگایا۔
اوکاڑہ(نامہ نگار ملک ظفر)مینیجنگ ڈائریکٹر واسا فاروق نجیب کا شہر کا دورہ،کے اور روڈ ریسٹوریشن اور جاری ترقیاتی منصوبوں کی رفتار و معیار کا تفصیلی جائزہ، مینیجنگ ڈائریکٹر واسا فاروق نجیب نے شہر کے مختلف علاقوں کا تفصیلی دورہ کیا اور سڑکوں کی بحالی اور دیگر ترقیاتی کاموں کا معائنہ کیا اور کام کی پیش رفت اور تعمیراتی معیار کا باریک بینی سے جائزہ لیا۔ ایم ڈی واسا فاروق نجیب نے موقع پر موجود متعلقہ افسران اور سائیٹ انجینئرز کو کام کی رفتار مزید تیز کرنے کی ہدایت کی۔ انہوں نے کہا کہ تمام جاری ترقیاتی منصوبے متعین وقت کے اندر مکمل کیے جائیں تاکہ شہریوں کو درپیش مشکلات کا جلد از جلد خاتمہ ہو سکے۔ انہوں نے متعلقہ حکام کو ہدایت کی کہ معائنے کے عمل کو روزانہ کی بنیاد پر یقینی بنایا جائے اور معیار پر کوئی سمجھوتہ نہ کیا جائے۔ فاروق نجیب نے کہا کہ ہمارا بنیادی مقصد شہر میں جاری واسا کے تمام ترقیاتی منصوبوں اور روڈ ریسٹوریشن کو بلا تاخیر مکمل کرنا ہے تاکہ شہریوں کو نقل و حرکت میں درپیش مشکلات سے جلد از جلد ریلیف فراہم کیا جا سکے۔