اسلام آباد: قائم مقام صدر سید یوسف رضا گیلانی نے پاکستان اور اٹلی کے درمیان دیرینہ دوستانہ تعلقات کو مزید مضبوط بنانے کی ضرورت پر زور دیتے ہوئے تجارت، سرمایہ کاری، زراعت، افرادی قوت کی نقل و حرکت اور عوامی روابط سمیت مختلف شعبوں میں تعاون بڑھانے پر زور دیا ہے۔
ایوان صدر کے پریس ونگ کے مطابق قائم مقام صدر نے ان خیالات کا اظہار اٹلی کے سفیر یوگو چیئرلاتانی سے ملاقات کے دوران کیا۔ اطالوی سفیر نے ایوان صدر میں قائم مقام صدر سے ملاقات کی، جس میں دوطرفہ تعلقات اور باہمی دلچسپی کے مختلف امور پر تبادلہ خیال کیا گیا۔
سید یوسف رضا گیلانی نے کہا کہ پاکستان اٹلی کے ساتھ اپنے دیرینہ اور دوستانہ تعلقات کو انتہائی اہمیت دیتا ہے، جو باہمی احترام اور مختلف شعبوں میں بڑھتے ہوئے تعاون پر مبنی ہیں۔ انہوں نے امید ظاہر کی کہ اطالوی سفیر اپنی سفارتی ذمہ داریوں کے دوران دونوں ممالک کے تعلقات کو مزید مستحکم بنانے میں اہم کردار ادا کریں گے۔
قائم مقام صدر نے کہا کہ پاکستان اٹلی کے نائب وزیراعظم اور وزیر خارجہ کے دورہ پاکستان کا منتظر ہے، جس سے دونوں ممالک کے درمیان تعاون کو مزید آگے بڑھانے کے نئے مواقع پیدا ہوں گے۔
پاکستان اور اٹلی کے اقتصادی تعلقات کا ذکر کرتے ہوئے سید یوسف رضا گیلانی نے کہا کہ دونوں ممالک کے درمیان دوطرفہ تجارت اور سرمایہ کاری کو مزید وسعت دینے کے وسیع امکانات موجود ہیں۔ انہوں نے پاکستان میں اطالوی کمپنیوں کی موجودگی کا خیرمقدم کرتے ہوئے باہمی دلچسپی کے شعبوں میں مزید اطالوی سرمایہ کاری کی حوصلہ افزائی کی۔
قائم مقام صدر نے اسلام آباد میں اٹلی کے نئے سفارتی مشن کی تکمیل پر بھی اطالوی سفیر کو مبارکباد دی۔ انہوں نے تکنیکی اور پیشہ ورانہ شعبوں میں اٹلی کے تعاون کو سراہتے ہوئے فیصل آباد میں پاکستان-اٹلی ٹیکسٹائل سینٹر اور لاہور میں فٹ ویئر سینٹر کے قیام سمیت سائنسی اور ماحولیاتی شعبوں میں تعاون کو اہم قرار دیا۔
انہوں نے اٹلی میں پاکستانی طلبہ کے لیے دستیاب تعلیمی مواقع کا خیرمقدم کرتے ہوئے افرادی قوت، مزدوروں کی ہجرت اور نقل و حرکت سے متعلق پاکستان-اٹلی مفاہمت کی یادداشت کی اہمیت پر زور دیا۔ ان کا کہنا تھا کہ یہ تعاون محفوظ، منظم اور قانونی ہجرت کو آسان بنانے میں مددگار ثابت ہوگا۔
سید یوسف رضا گیلانی نے اٹلی کی جانب سے آئندہ تین برسوں کے دوران پاکستان سے 10 ہزار 500 ہنرمند کارکنوں کی بھرتی کے فیصلے کا بھی خیرمقدم کیا۔ انہوں نے کہا کہ افرادی قوت کی قانونی نقل و حرکت دونوں ممالک کے عوام کے درمیان روابط مزید مضبوط بنانے میں اہم کردار ادا کرے گی۔
قائم مقام صدر نے اقوام متحدہ کی سلامتی کونسل کی 2025-26 کی مدت کے لیے غیر مستقل رکن کے طور پر پاکستان کے انتخاب میں اٹلی کی حمایت پر بھی شکریہ ادا کیا۔ انہوں نے کہا کہ پاکستان اقوام متحدہ اور دیگر کثیرالجہتی فورمز پر اٹلی کے ساتھ مسلسل رابطے اور تعاون جاری رکھنے کا خواہاں ہے۔
اس موقع پر اطالوی سفیر یوگو چیئرلاتانی نے کہا کہ پاکستان میں ان کی سفارتی مدت کے دوران ان کی ترجیحات میں دونوں ممالک کے دوطرفہ تعلقات کو مزید بہتر بنانا اور پاکستان میں اطالوی سرمایہ کاری میں اضافہ شامل ہوگا۔
اطالوی سفیر نے کہا کہ انہیں خوشی ہے کہ انہوں نے ایسے وقت میں پاکستان میں ذمہ داریاں سنبھالی ہیں جب پاکستان خطے میں امن و سلامتی کے فروغ کے لیے اہم کردار ادا کر رہا ہے۔
یوگو چیئرلاتانی نے بتایا کہ اٹلی میں پاکستانی نژاد تقریباً 3 لاکھ افراد رہائش پذیر ہیں، کام کر رہے ہیں اور تعلیم حاصل کر رہے ہیں، جو دونوں ممالک کے درمیان عوامی اور باہمی تعلقات کو مزید مضبوط بنانے میں اپنا کردار ادا کر رہے ہیں۔