گلگت بلتستان انتخابات میں مسلم لیگ (ن) اور جماعتِ اسلامی کے درمیان دو اہم حلقوں میں انتخابی اتحاد طے پا گیا۔ اتحاد کے تحت استور حلقہ 2 اور گلگت حلقہ 2 میں جماعتِ اسلامی کے امیدوار مسلم لیگ (ن) کے حق میں دستبردار ہو گئے ہیں۔
مسلم لیگ (ن) گلگت بلتستان کے صوبائی صدر حافظ حفیظ الرحمٰن نے کہا ہے کہ یہ انتخابی اتحاد مرکزی قیادت کی مشاورت سے عمل میں آیا۔ انہوں نے اس فیصلے پر جماعتِ اسلامی کا شکریہ بھی ادا کیا۔دوسری جانب جماعتِ اسلامی گلگت بلتستان کے سابق امیر مولانا عبد السمیع کا کہنا ہے کہ 2015ء میں مسلم لیگ (ن) کی کارکردگی بہتر رہی تھی، اسی بنیاد پر اتحاد کا فیصلہ کیا گیا۔انہوں نے مزید بتایا کہ جماعتِ اسلامی کے امیدوار باضابطہ طور پر مسلم لیگ (ن) کے حق میں دستبردار ہو چکے ہیں۔
واضح رہے کہ گلگت بلتستان انتخابات کے حوالے سے سیاسی سرگرمیاں تیزی اختیار کر گئی ہیں، جبکہ پہلی بار 21 خواتین نے بھی کاغذاتِ نامزدگی جمع کرا کے انتخابی عمل میں بھرپور دلچسپی کا اظہار کیا ہے۔