محکمہ موسمیات کے مطابق کراچی میں گرج چمک، تیز ہواؤں کے ساتھ درمیانی اورموسلا دھار بارش کا امکان ہے، اس وقت مغربی ہواؤں کا سلسلہ ملک کے بیشتر علاقوں پر اثر انداز ہے-
محکمہ موسمیات کے مطابق حیدرآباد، ٹھٹھہ،سجاول، بدین، مٹیاری میں بھی درمیانی سےتیزبارش ہوسکتی ہےسندھ کے چند مقامات میں ژالہ باری کا امکان بھی ہے، بارش کے دوران چند مقامات پر آسمانی بجلی گرنے کا بھی خدشہ ہے، جمعہ کو کراچی میں موسم زیادہ تر صاف اور دھوپ نکلی رہے گی، ہفتہ کو شہر میں دوبارہ بادل اور مضافاتی علاقوں میں بارش کا امکان ہے۔
دوسری جانب کراچی میں ہونے والی موسلادھار بارش نے ایک بار پھر شہر کے کمزور انفرا اسٹرکچر کی قلعی کھول دی، بارش اور تیز ہوائیں چلنے سے بلدیہ موا چھ گوٹھ میں خالی پلاٹ کی دیوار گر گئی، جس کے باعث 13 افراد جاں بحق ہوگئے، جاں بحق افراد میں منشیات کے عادی افراد اور راہگیر شامل ہیں۔
ریسکیو حکام کے مطابق متاثرہ افراد بارش سے بچنے کے لیے دیوار کے ساتھ بیٹھے ہوئے تھے، وزیراعلیٰ سندھ نے واقعے کا نوٹس لیتے ہوئے فوری اقدا ما ت کی ہدایت کی ہے، جبکہ صوبائی وزیر داخلہ ضیا لنجار نے حادثے کے مقام کا دورہ کرکے باقی دیوار گرانے اور علاقے میں منشیات کے عادی افراد کے خلاف کارروائی کا حکم دے دیا۔
شہر کے دیگر علاقوں لانڈھی، کورنگی، گلستان جوہر، سرجانی ٹاون اور ملیر درخت اور دیواریں گرنے اور آسمانی بجلی گرنے کے واقعات میں مزید 6 افراد جاں بحق اور متعدد زخمی ہوئے، جناح اسپتال میں بھی 60 سے زائد زخمیوں کو طبی امداد کے لیے منتقل کیا گیا، شہر کے مختلف علاقوں میں بارش کے بعد سے بجلی فراہمی معطل ہے، دوسری جانب کے الیکٹرک کا کہنا ہے کہ، بیشتر علاقوں میں بجلی بحال کردی گئی ہے، انتظامیہ نے شہریوں کو خراب موسم میں احتیاط برتنے کی ہدایت کی ہے۔
وزیر بلدیات سندھ ناصر حسین شاہ نے کراچی سمیت پورے صوبے میں ہاٸی الرٹ جاری کرتے ہوئے متعلقہ محکموں کے تمام عملے کی عید کی چھٹیاں منسوخ کردیں۔
وزیر بلدیات نے کہا کہ سندھ حکومت عوام کے جان و مال کی حفاظت کے لیے سرگرم ہے، عوام گھروں میں رہے اور بجلی تنصیبات کو ہاتھ لگانے میں احتیاط کریں جبکہ بارش ہوتے ہی شہر کے بیشتر مقامات تاریکی میں ڈوب گئے کے الیکٹرک کے مطابق بجلی فراہم کرنے والے2100فیڈر میں سے 560 فیڈرز پر بجلی کی فراہمی بند ہے۔
ترجمان کے الیکٹرک کا مزید بتانا ہے کہ شہر کے مختلف حصوں سے تیز درجہ کی بارش اور تیز ہواؤں کے بعد بجلی کی فراہمی بند ہوئی، اور بجلی سپلائی لائنوں پر درخت، بل بورڈز وغیرہ گرنے کی اطلاعات ہیں،دوسری جانب کمشنر کراچی سید حسن نقوی نے بتایا کہ بارشوں سے نمٹنے کے لیے شہر بھر میں انتظامیہ ہائی الرٹ ہے اور بارشوں سے نمٹنے آور امدادی کاموں کے لیے اپنا بھرپور کردار ادا کرنے کے ڈپٹی کمشنر اور اسسٹنٹ کمیشنر فیلڈ میں موجود ہیں۔