راولپنڈی میں حنا جاوید کے واقعے کے بعد ایک اور شادی شدہ خاتون مبینہ طور پر قتل کردی گئی۔ پولیس نے مقتولہ کے شوہر تنویر احمد سمیت 2 افراد کو گرفتار کرلیا جبکہ واقعے کا مقدمہ مقتولہ کے بھائی محمد ابراہیم کی مدعیت میں درج کرلیا گیا ہے۔
پولیس کے مطابق تھانہ صدر بیرونی کی حدود حبیب لین میں شادی شدہ خاتون سندس کی پھندہ لگی لاش گھر کے ایک کمرے سے برآمد ہوئی۔ مقدمے میں مقتولہ کے شوہر تنویر احمد، اس کی بہن فضاء اور عبدالعزیز کو نامزد کیا گیا ہے۔
ایف آئی آر کے متن کے مطابق سندس کی شادی تقریباً 2 سال قبل تنویر احمد سے ہوئی تھی اور دونوں کا ایک بچہ بھی ہے۔ مقتولہ کے بھائی نے الزام عائد کیا کہ اس کی بہن کو شوہر کی جانب سے مبینہ طور پر ذہنی دباؤ کا سامنا تھا اور وہ متعدد مرتبہ اپنے ساتھ ہونے والی مبینہ زیادتیوں اور پریشانیوں کی شکایت کرچکی تھی۔
مقدمے کے مطابق واقعے سے قبل گزشتہ رات سندس نے فون پر اپنی والدہ کو بتایا تھا کہ سسرال والے اسے بہت زیادہ پریشان کررہے ہیں۔ رات تقریباً ساڑھے 10 بجے جب مقتولہ کے گھر دوبارہ فون کیا گیا تو کال اس کے شوہر کی بہن فضاء نے وصول کی اور بتایا کہ سندس نے مبینہ طور پر خودکشی کرلی ہے۔
ایف آئی آر کے مطابق اطلاع ملنے پر مقتولہ کا بھائی گھر پہنچا تو اس نے اپنی بہن کو پھندے کی حالت میں پایا۔ بھائی نے الزام عائد کیا کہ سندس کو خودکشی نہیں بلکہ گلے میں پھندا ڈال کر قتل کیا گیا، جبکہ اس کے ہاتھوں پر مہندی بھی لگی ہوئی تھی۔
پولیس کا کہنا ہے کہ مقتولہ کی لاش گھر کے کمرے سے برآمد ہوئی، جبکہ اس کے شوہر تنویر احمد اور کزن عبدالعزیز کو گرفتار کرلیا گیا ہے۔ خاتون کا پوسٹ مارٹم کرایا گیا جبکہ مزید شواہد کے لیے فارنزک نمونے بھی حاصل کرلیے گئے ہیں۔
پولیس کے مطابق واقعے کی تمام پہلوؤں سے تفتیش جاری ہے اور پوسٹ مارٹم، فارنزک شواہد اور دیگر تحقیقات کی روشنی میں واقعے کی اصل صورتحال کا تعین کیا جائے گا۔