لاہور میں گزشتہ 24 گھنٹوں کے دوران خواتین اور کم عمر لڑکیوں سے مبینہ زیادتی اور زیادتی کی کوشش کے 8 واقعات رپورٹ ہوئے۔ پولیس کے مطابق تمام واقعات کے مقدمات درج کرلیے گئے ہیں، تاہم تاحال کسی بھی ملزم کو گرفتار نہیں کیا جاسکا۔
پولیس کے مطابق کاہنہ کے علاقے میں دو افراد ذیشان عرف شانی اور کاشو نے مبینہ طور پر نوکری دلانے کا جھانسہ دے کر ایک شادی شدہ خاتون کو اجتماعی زیادتی کا نشانہ بنایا اور اس کی قابل اعتراض ویڈیو بھی بنائی۔
نشتر کالونی میں ایک شخص پر مبینہ طور پر جھوٹا نکاح کرکے خاتون سے زیادتی کرنے کا الزام عائد کیا گیا، جبکہ کوٹ لکھپت میں ایک شخص نے مبینہ طور پر اپنی سابقہ بیوی کو زیادتی کا نشانہ بنایا۔
نواب ٹاؤن میں مدثر نامی ملزم پر الزام ہے کہ اس نے خاتون کو شادی کا جھانسہ دے کر تقریباً ڈیڑھ سال تک مبینہ زیادتی کا نشانہ بنایا۔
پولیس کے مطابق ہنجر وال کے علاقے میں کاشف نامی ملزم نے مبینہ طور پر اپنی سابقہ بیوی کو زیادتی کا نشانہ بنایا، جبکہ شاہدرہ ٹاؤن میں علی رضا نامی شخص پر الزام ہے کہ اس نے لڑکی کو شادی کا جھانسہ دے کر مبینہ زیادتی کا نشانہ بنایا۔
دوسری جانب ملت پارک میں الیاس نامی شخص پر اپنی 14 سالہ بھتیجی سے مبینہ زیادتی کی کوشش کا الزام عائد کیا گیا، جبکہ باغبانپورہ میں علی نامی ملزم نے مبینہ طور پر 16 سالہ ذہنی معذور لڑکی کو زیادتی کا نشانہ بنانے کی کوشش کی۔
پولیس کا کہنا ہے کہ تمام واقعات کے مقدمات درج کرکے تحقیقات شروع کردی گئی ہیں، تاہم تاحال کسی ملزم کی گرفتاری عمل میں نہیں آسکی۔