کراچی میں جدید پولیسنگ کیلئے سیکیورٹی ٹریننگ ہینڈ بک متعارف

کراچی میں جدید دور کے سیکیورٹی چیلنجز اور بدلتے ہوئے جرائم سے نمٹنے کے لیے “سیکیورٹی ٹریننگ ہینڈ بک” متعارف کروا دی گئی ہے، جسے پولیس اور دیگر سیکیورٹی اداروں کی پیشہ ورانہ تربیت کے لیے ایک اہم پیش رفت قرار دیا جا رہا ہے۔
‎ڈی آئی جی سیکیورٹی مقصود احمد کے مطابق اس جدید ہینڈ بک کا باقاعدہ اجرا صدرِ مملکت آصف علی زرداری کو کتاب پیش کر کے کیا گیا۔
‎یہ جامع تربیتی دستاویز اسپیشل سیکیورٹی یونٹ کی جانب سے تیار کی گئی ہے، جس کا مقصد پولیسنگ کے نظام کو جدید اور بین الاقوامی معیار کے مطابق بنانا ہے۔
‎ڈی آئی جی مقصود احمد کا کہنا ہے کہ موجودہ دور میں دہشت گردی، سائبر کرائم اور دیگر پیچیدہ خطرات کے باعث ایسی ہینڈ بک کی ضرورت شدت سے محسوس کی جا رہی تھی، جو سیکیورٹی کے شعبے میں موجود خلا کو پُر کر سکے۔
‎انہوں نے بتایا کہ یہ کتاب پولیس کے ٹیکٹیکل یونٹس، ایمرجنسی رسپانڈرز، سائبر ماہرین اور دیگر سیکیورٹی پروفیشنلز کے لیے خصوصی طور پر تیار کی گئی ہے۔
‎ہینڈ بک میں جدید پولیسنگ اور سیکیورٹی آپریشنز سے متعلق متعدد اہم موضوعات شامل کیے گئے ہیں، جن میں ٹیکٹیکل ریڈیو کمیونیکیشن، جدید اسلحے کا استعمال، آئی ای ڈیز کا تدارک، غیر مہلک ہتھیاروں کا استعمال، اہم تنصیبات کا تحفظ، ڈیزاسٹر مینجمنٹ اور ایمرجنسی رسپانس شامل ہیں۔
‎اس کے علاوہ وی وی آئی پی سیکیورٹی پروٹوکول، موٹرکیڈ آپریشنز، انسدادِ دہشت گردی حکمت عملی، سائبر سیکیورٹی، ڈیجیٹل انتہا پسندی اور مستقبل کی سیکیورٹی ٹیکنالوجیز پر بھی تفصیلی رہنمائی فراہم کی گئی ہے۔
‎حکام کے مطابق اس ہینڈ بک کو پاکستان کے زمینی حقائق اور مقامی حالات کے مطابق تیار کیا گیا ہے، جس میں حقیقی تجربات، مقامی مثالیں اور بین الاقوامی اصول شامل کیے گئے ہیں۔
‎اس منصوبے کی تیاری میں سینئر پولیس افسران، عسکری ماہرین، بیوروکریٹس اور سیکیورٹی شعبے کے معروف ماہرین نے حصہ لیا۔
‎ابتدائی مرحلے کے بعد اس ہینڈ بک کو ملک بھر کے پولیس ٹریننگ اداروں اور خصوصی سیکیورٹی اکیڈمیز میں بھی فراہم کیا جائے گا تاکہ فورسز کی صلاحیتوں کو عالمی معیار کے مطابق بہتر بنایا جا سکے۔