اوکاڑہ(نامہ نگار ملک ظفر)سی ایم پنجاب یوتھ گیمز کے حوالے سے ڈپٹی کمشنر محمد اکرام ملک کی زیر صدارت اہم اجلاس، 25 ستمبر تک رجسٹریشن کا آغاز، اجلاس میں ڈسٹرکٹ سپورٹس آفیسر محمد اشفاق نے سی ایم پنجاب یوتھ گیمز کی تیاریوں، کھیلوں کے مقابلوں اور رجسٹریشن کے طریقہ کار کے حوالے سے تفصیلی بریفنگ دی۔ اس موقع پر نجی و سرکاری سکولوں اور کالجز کے افسران نے شرکت کی، ڈسٹرکٹ سپورٹس آفیسر محمد اشفاق نے کہا کہ ضلع بھر کے سرکاری اور نجی تعلیمی اداروں کے طلباء و طالبات کے لیے 25 ستمبر تک آن لائن رجسٹریشن کا باقاعدہ آغاز کر دیا گیا ہے، وزیراعلیٰ پنجاب کی خصوصی اقدام کے ذریعے نوجوانوں میں کھیلوں کی سرگرمیوں کو فروغ دینے اور نئے ٹیلنٹ کی تلاش کے لیے بہترین پلیٹ فارم فراہم کیا جا رہا ہے۔ ڈپٹی کمشنر نے محکمہ تعلیم اور تمام متعلقہ اداروں کے افسران کو ہدایت کی کہ وہ خصوصی ایپ کے ذریعے تمام مستحق اور باصلاحیت کھلاڑیوں کی جلد از جلد آن لائن رجسٹریشن یقینی بنائیں۔ انہوں نے کہا کہ پنجاب یوتھ گیمز کے ذریعے مقامی سطح پر نوجوانوں کے ٹیلنٹ کو ابھارنے اور انہیں صحت مند سرگرمیوں کی طرف راغب کرنے کے لیے تمام تر وسائل برکار لائے جائیں گے۔ ڈپٹی کمشنر نے کہا کہ پنجاب یوتھ گیمز ہمارے نوجوانوں کے لیے اپنے چھپے ہوئے کھیل کے ٹیلنٹ کو سامنے لانے کا بہترین پلیٹ فارم ہیں، تمام تعلیمی ادارے اس موقع سے بھرپور فائدہ اٹھائیں۔ محمد اکرام ملک نے کہا کہ ہماری ترجیح ہے کہ ضلع اوکاڑہ کا ہر باصلاحیت کھلاڑی ان گیمز میں حصہ لے سکے، کھیلوں کے میدان آباد کرنا ہی ایک صحت مند اور مثبت معاشرے کی ضامن ہے۔