اوکاڑہ (نامہ نگار ملک ظفر)یوم دفاع پاکستان کے سلسلہ میں ضلع بھر کے سرکاری سکولوں میں خصوصی تقریبات کا انعقاد۔ 6 ستمبر یوم دفاع کی مناسبت سے سی ای او ایجوکیشن محمد یوسف کاہلوں کی زیر نگرانی منعقد ہوئیں، جن میں طلبا و طالبات نے ملی نغموں، ٹیبلوز، تقاریری مقابلوں اور دیگر مختلف پروگرامز میں بھرپور حصہ لیا۔ طلبا و طالبات نے اپنی پرفارمنس کے ذریعے وطن عزیز سے محبت، قومی یکجہتی اور پاک فوج کی قربانیوں کو خراج تحسین پیش کیا۔ مختلف سکولوں میں منعقدہ تقریبات میں طلبا نے قومی جوش و جذبے کا مظاہرہ کرتے ہوئے ملی نغمے پیش کیے جبکہ ٹیبلوز اور تقاریر کے ذریعے یوم دفاع کی اہمیت کو اجاگر کیا۔ سی ای او ایجوکیشن محمد یوسف کاہلوں نے کہا کہ یوم دفاع ہمیں اپنے شہداء اور غازیوں کی لازوال قربانیوں کی یاد دلاتا ہے۔ نئی نسل کو وطن عزیز کی تاریخ، دفاع اور قومی ذمہ داریوں سے آگاہ کرنا تعلیمی اداروں کی اہم ذمہ داری ہے۔ تعلیمی اداروں کا مقصد صرف نصابی تعلیم دینا نہیں بلکہ طلبا میں حب الوطنی، قومی شعور اور ذمہ داری کا احساس پیدا کرنا بھی ہے۔ یوم دفاع کی تقریبات نئی نسل کو وطن عزیز کے دفاع کے لیے دی جانے والی قربانیوں سے روشناس کرانے کا بہترین ذریعہ ہیں۔
اوکاڑہ(نامہ نگار ملک ظفر)دفاعِ پاکستان کی مناسبت سے اسپورٹس ڈیپارٹمنٹ کے زیرِ اہتمام شاندار نمائشی کرکٹ میچ کا انعقاد، اس پروقار تقریب میں ڈسٹرکٹ آفیسر انڈسٹریز خالد جاوید بھٹی اور سول ڈیفنس آفیسر جاوید اختر کھچی نے بطور مہمانان خصوصی شرکت کی اور کھلاڑیوں کی حوصلہ افزائی کی۔ میچ کے دوران دونوں ٹیموں کے درمیان انتہائی دلچسپ اور سنسنی خیز مقابلہ دیکھنے کو ملا، جہاں کھلاڑیوں نے بہترین اسپورٹس مین اسپرٹ اور شاندار کھیل کا مظاہرہ کیا۔ تقریب کے اختتام پر مہمانان اور ڈسٹرکٹ سپورٹس آفیسر محمد اشفاق نے نمایاں کارکردگی دکھانے والے کھلاڑیوں میں انعامات تقسیم کیے۔ ڈسٹرکٹ آفیسر انڈسٹریز خالد جاوید بھٹی نے کہا کہ 6 ستمبر ہماری قومی تاریخ کا کا ایک سنہرا باب ہے۔ کھیل کے میدان میں نوجوانوں کا یہ جوش و جذبہ اس بات کا ثبوت ہے کہ ہماری قوم اپنے دفاع اور تعمیر کے لیے ہر دم تیار ہے۔ سول ڈیفنس آفیسر جاوید اختر کھچی نے کہا کہ اسپورٹس ڈیپارٹمنٹ کی جانب سے یومِ دفاع پر اتنے بہترین نمائشی میچ کا انعقاد قابل تحسین ہے۔ دونوں ٹیموں نے جس شاندار اور دوستانہ ماحول میں کھیل پیش کیا، وہ قابل دید تھا۔ ڈسٹرکٹ سپورٹس آفیسر محمد اشفاق نے کہا کہ یومِ دفاعِ پاکستان ہمیں اپنے شہداء اور غازیوں کی عظیم قربانیوں کی یاد دلاتا ہے۔ اسپورٹس ڈیپارٹمنٹ کا مقصد کھیلوں کے توسط سے نوجوان نسل میں وہی قومی جذبہ، اتحاد اور ڈسپلن پیدا کرنا ہے۔