جنیوا ڈیجیٹل ویک کے تیسرے روز پاکستان نے عالمی سطح پر ڈیجیٹل شعبے میں اپنی مؤثر موجودگی کا مظاہرہ کرتے ہوئے کمبوڈیا کے ساتھ ڈیجیٹل تعاون کو مزید وسعت دینے پر اتفاق کیا۔ اس سلسلے میں وفاقی وزیر برائے انفارمیشن ٹیکنالوجی و ٹیلی کمیونیکیشن شزا فاطمہ خواجہ نے کمبوڈیا کے وزیر برائے پوسٹ اینڈ ٹیلی کمیونیکیشن چیا وانڈیتھ سے اہم ملاقات کی، جس میں دونوں ممالک کے درمیان جدید ٹیکنالوجی، ڈیجیٹل انفراسٹرکچر اور باہمی تعاون کے مختلف پہلوؤں پر تفصیلی تبادلہ خیال کیا گیا۔
ملاقات کے دوران دونوں وزراء نے اس عزم کا اظہار کیا کہ پاکستان اور کمبوڈیا ڈیجیٹل ٹرانسفارمیشن کے مشترکہ اہداف کے حصول کے لیے ایک دوسرے کے تجربات سے فائدہ اٹھائیں گے۔ اس موقع پر ڈیجیٹل گورننس، جدید ٹیکنالوجی، مصنوعی ذہانت، ای گورنمنٹ، سائبر سیکیورٹی، ڈیجیٹل مہارتوں کے فروغ اور عوام کو بہتر آن لائن سہولیات فراہم کرنے کے امکانات پر بھی گفتگو ہوئی۔
وفاقی وزیر شزا فاطمہ خواجہ نے پاکستان کے تیزی سے ترقی کرتے ہوئے آئی ٹی سیکٹر، نوجوان افرادی قوت اور ڈیجیٹل معیشت کے فروغ کے لیے حکومت کی پالیسیوں سے آگاہ کیا۔ انہوں نے کہا کہ پاکستان عالمی شراکت داروں کے ساتھ مل کر ٹیکنالوجی کے میدان میں تعاون بڑھانے اور سرمایہ کاری کے نئے مواقع پیدا کرنے کے لیے پرعزم ہے۔
کمبوڈیا کے وزیر چیا وانڈیتھ نے بھی پاکستان کے آئی ٹی شعبے میں ہونے والی پیش رفت کو سراہتے ہوئے مختلف شعبوں میں تعاون بڑھانے میں دلچسپی کا اظہار کیا۔ دونوں رہنماؤں نے اس بات پر اتفاق کیا کہ باہمی روابط کو مزید مضبوط بنانے سے دونوں ممالک کی ڈیجیٹل معیشت کو فائدہ پہنچے گا اور ٹیکنالوجی کے شعبے میں نئے مواقع پیدا ہوں گے۔
جنیوا ڈیجیٹل ویک کے دوران پاکستان کی بھرپور نمائندگی کو عالمی سطح پر مثبت پیش رفت قرار دیا جا رہا ہے۔ مختلف بین الاقوامی فورمز پر پاکستانی وفد کی شرکت اور عالمی رہنماؤں سے ملاقاتوں کو ملک کے آئی ٹی سیکٹر کے لیے اہم سنگ میل تصور کیا جا رہا ہے۔
حکومتی حلقوں کے مطابق پاکستان مستقبل میں بھی ایسے عالمی پلیٹ فارمز پر اپنی موجودگی مزید مؤثر بناتے ہوئے بین الاقوامی شراکت داری، سرمایہ کاری اور جدید ٹیکنالوجی کے تبادلے کو فروغ دینے کے لیے عملی اقدامات جاری رکھے گا۔
جنیوا ڈیجیٹل ویک، پاکستان اور کمبوڈیا کے درمیان ڈیجیٹل تعاون بڑھانے پر اتفاق
