وفاقی وزیر دفاع خواجہ آصف نے کہا ہے کہ آپریشن “بنیان مرصوص” میں حاصل ہونے والی کامیابی پاکستان کی تاریخ کا ایک روشن باب ہے، جسے ہمیشہ یاد رکھا جائے گا۔ جس بہادری، پیشہ ورانہ مہارت اور عزم کے ساتھ مسلح افواج نے ملک کا دفاع کیا، وہ عظمت قیامت تک قائم رہے گی۔
نجی ٹی وی کو انٹرویو دیتے ہوئے وزیر دفاع نے کہا کہ پاکستان نے اپنے ازلی دشمن کو ایسی شکست فاش دی ہے کہ وہ طویل عرصے تک اس کے اثرات سے نہیں نکل سکے گا۔ ان کا کہنا تھا کہ یہ کامیابی پوری قوم اور افواجِ پاکستان کی مشترکہ کاوشوں کا نتیجہ ہے۔خواجہ آصف نے وزیراعظم شہباز شریف کی قیادت کو سراہتے ہوئے کہا کہ انہوں نے مشکل وقت میں بہترین رہنمائی فراہم کی۔ انہوں نے فیلڈ مارشل عاصم منیر، ایئر چیف اور نیول چیف کی پیشہ ورانہ صلاحیتوں کو بھی خراج تحسین پیش کیا اور کہا کہ ان کی قیادت آنے والی نسلوں کے لیے مشعلِ راہ ہے۔
وزیر دفاع خواجہ آصف کا مزید کہنا تھا کہ ایسے تاریخی لمحات قوموں کی زندگی میں کم ہی آتے ہیں، اور یہ وقت قومی اتحاد اور یکجہتی کا تقاضا کرتا ہے۔افغانستان دہشتگردوں کو پناہ دے کر پاکستان کے خلاف جنگ مسلط کیے ہوئے ہے۔ ہ یہ جنگ ملکی بقا کی جنگ ہے، جس میں ہمارے سیکیورٹی اہلکار اپنی جانوں کا نذرانہ پیش کر رہے ہیں۔ قوم کو چاہیے کہ ذاتی مفادات سے بالاتر ہو کر اجتماعی مفاد کو ترجیح دے اور ملک کی سلامتی کے لیے متحد ہو جائے۔