پاکستان نے ایک بار پھر تعلیمی میدان میں نمایاں کامیابی حاصل کرتے ہوئے یورپی یونین کے معروف تعلیمی پروگرام ایراسمس پلس میں مسلسل پانچویں سال بھی پہلی پوزیشن برقرار رکھی ہے۔
یورپی یونین کے اعلان کردہ نتائج کے مطابق پاکستان کے 98 طلبہ و طالبات نے ایراسمس پلس اسکالرشپس حاصل کیں، جو کسی بھی شریک ملک کے مقابلے میں سب سے زیادہ تعداد ہے۔ اس شاندار کامیابی کے ساتھ پاکستان نے مسلسل پانچویں سال پروگرام میں اپنی برتری ثابت کر دی۔رواں سال یورپی یونین نے اپنے فلیگ شپ تعلیمی پروگرام کے تحت مجموعی طور پر ایک ہزار 872 اسکالرشپس کا اعلان کیا تھا، جن میں پاکستانی طلبہ نے نمایاں کارکردگی کا مظاہرہ کرتے ہوئے سب سے زیادہ وظائف اپنے نام کیے۔اس فہرست میں بنگلا دیش 80 اسکالرشپس کے ساتھ دوسرے نمبر پر رہا، جبکہ بھارت 75 اسکالرشپس حاصل کرکے تیسرے نمبر پر آیا۔
تعلیمی ماہرین کے مطابق پاکستانی طلبہ کی مسلسل کامیابی ملک میں اعلیٰ تعلیم کے معیار، بین الاقوامی سطح پر مسابقتی صلاحیت اور نوجوانوں کی علمی استعداد کا واضح ثبوت ہے۔ ایراسمس پلس پروگرام کے ذریعے منتخب طلبہ کو یورپ کی مختلف جامعات میں اعلیٰ تعلیم اور تحقیق کے مواقع فراہم کیے جاتے ہیں، جس سے ان کی پیشہ ورانہ اور تعلیمی صلاحیتوں میں مزید اضافہ ہوتا ہے۔