اسلام آباد: پاکستان پیپلز پارٹی کی مرکزی رہنما اور رکن قومی اسمبلی سحر کامران نے گلگت بلتستان کے انتخابات میں پارٹی کی کامیابی پر عوام کا شکریہ ادا کرتے ہوئے کہا ہے کہ گلگت بلتستان کے عوام نے پاکستان پیپلز پارٹی کے حق میں تاریخی فیصلہ دے کر جمہوریت پر اپنے اعتماد کا اظہار کیا ہے۔
اپنے بیان میں سحر کامران نے کہا کہ چیئرمین بلاول بھٹو زرداری کی عوام دوست سیاست اور وژن کو گلگت بلتستان کے عوام نے بھرپور پذیرائی دی ہے۔ انہوں نے کہا کہ انتخابی نتائج عوام کی ترقی، حقوق اور خوشحالی کے ایجنڈے کی حمایت کا واضح پیغام ہیں۔انہوں نے کہا کہ پیپلز پارٹی کی کامیابی شہید ذوالفقار علی بھٹو اور شہید محترمہ بینظیر بھٹو کے نظریات کی فتح ہے، جبکہ عوام نے نفرت اور تقسیم کی سیاست کو مسترد کرکے خدمت، ترقی اور عوامی فلاح کے سفر کا انتخاب کیا ہے۔سحر کامران کا کہنا تھا کہ گلگت بلتستان کے عوام نے ثابت کر دیا ہے کہ وہ اپنے حقوق کے تحفظ اور بہتر مستقبل کے لیے پاکستان پیپلز پارٹی پر اعتماد کرتے ہیں۔ انہوں نے کہا کہ صدر آصف علی زرداری اور چیئرمین بلاول بھٹو زرداری کی قیادت میں عوامی خدمت کا سفر مزید مضبوط ہوگا۔
انہوں نے مزید کہا کہ گلگت بلتستان کے عوام کو بلاول بھٹو زرداری اور بی بی آصفہ بھٹو زرداری کی قیادت میں اپنے روشن، محفوظ اور خوشحال مستقبل کی جھلک نظر آ رہی ہے۔ نوجوانوں، خواتین اور پسماندہ طبقات کی نمائندہ جماعت ہونے کے ناطے پیپلز پارٹی عوام کی امیدوں پر پورا اترنے کے لیے اپنی بھرپور صلاحیتیں بروئے کار لائے گی۔سحر کامران نے کہا کہ گلگت بلتستان کے ووٹرز نے جمہوری عمل کو کامیاب بنا کر سیاسی شعور کا عملی مظاہرہ کیا ہے۔ یہ کامیابی عوامی اعتماد، مسلسل جدوجہد اور پیپلز پارٹی کی عوامی سیاست کا ثمر ہے،انہوں نے اس عزم کا اظہار کیا کہ پیپلز پارٹی عوامی مینڈیٹ کا احترام کرتے ہوئے گلگت بلتستان میں ترقی، روزگار اور بہتر طرزِ حکمرانی کے نئے دور کے آغاز کے لیے بھرپور کردار ادا کرے گی اور خطے کی خوشحالی کے لیے تمام ممکنہ اقدامات کیے جائیں گے،