پشاور میں امریکی قونصل خانے کی مرحلہ وار بندش کا اعلان

امریکی محکمۂ خارجہ نے پشاور میں قائم امریکی قونصل خانے کو مرحلہ وار بند کرنے کا اعلان کر دیا ہے۔ اس فیصلے کے تحت خیبر پختون خوا سے متعلق تمام سفارتی امور اب اسلام آباد میں قائم امریکی سفارتخانے کو منتقل کیے جائیں گے۔

جاری کردہ بیان کے مطابق یہ اقدام سفارتی عملے کی سیکیورٹی کو یقینی بنانے اور دستیاب وسائل کے مؤثر استعمال کے پیش نظر اٹھایا گیا ہے۔ حکام کا کہنا ہے کہ بدلتے ہوئے سیکیورٹی حالات اور انتظامی ضروریات کے باعث یہ فیصلہ ناگزیر ہو گیا تھا۔بیان میں واضح کیا گیا ہے کہ قونصل خانے کی بندش کے باوجود پاکستان کے حوالے سے امریکی پالیسی ترجیحات میں کوئی تبدیلی نہیں آئے گی۔ امریکا خیبر پختون خوا کے عوام اور مقامی حکام کے ساتھ اپنے روابط برقرار رکھے گا تاکہ معاشی تعاون اور ترقیاتی سرگرمیوں کو فروغ دیا جا سکے۔مزید برآں، امریکی محکمۂ خارجہ نے اس عزم کا اعادہ کیا ہے کہ علاقائی سلامتی کے فروغ اور امریکی مفادات کے تحفظ کے لیے خیبر پختون خوا میں عوامی و سرکاری سطح پر رابطے جاری رکھے جائیں گے۔