اسلام آباد : آزاد جموں و کشمیر میں پاکستان پیپلز پارٹی اور جمعیت علماء اسلام (ف) نے آئندہ انتخابات 2026 میں مشترکہ طور پر حصہ لینے کا اعلان کیا ہے۔
جموں و کشمیر ہاؤس اسلام آباد میں ہونے والے اہم اجلاس میں دونوں جماعتوں کے رہنماؤں نے انتخابی اتحاد پر اتفاق کیا اجلاس میں وزیراعظم آزاد کشمیر فیصل ممتاز راٹھور، پیپلز پارٹی آزاد کشمیر کے صدر چوہدری محمد یاسین، سابق وزیراعظم سردار تنویر الیاس اور دیگر رہنما شریک ہوئے،جے یو آئی (ف) کے وفد کی قیادت مولانا سعید یوسف نے کی جبکہ مولانا امتیاز عباسی اور مولانا ادریس بھی موجود تھے۔
فیصل ممتاز راٹھور نے کہا کہ جے یو آئی (ف) نے ہمیشہ جمہوری رواداری کے فروغ میں اہم کردار ادا کیا ہے اور یہ اتحاد خطے کی سیاست میں مثبت تبدیلی لائے گا چوہدری محمد یاسین نے کہا کہ دونوں جماعتیں اصولی بنیادوں پر اکٹھی ہوئی ہیں اور پیپلز پارٹی امیدواروں کے حق میں جے یو آئی بھرپور انتخابی مہم چلائے گی۔ انہوں نے کہا کہ پلندری اور دھیرکوٹ میں پیپلز پارٹی جے یو آئی امیدواروں کی حمایت کرے گی جبکہ دیگر حلقوں میں جے یو آئی پیپلز پارٹی کے امیدواروں کی حمایت کرے گی۔
مولانا سعید یوسف نے کہا کہ اتحاد خطے کی سیاست میں اہم پیش رفت ہے اور دونوں جماعتیں مل کر عوامی مسائل کے حل کے لیے جدوجہد کریں گی اتحاد کا باضابطہ اعلان چیئرمین بلاول بھٹو زرداری کی آمد پر کیا جائے گا۔
دونوں جماعتوں کے رہنماؤں نے اس اتحاد کو عوامی مفاد اور سیاسی استحکام کے لیے ناگزیر قرار دیتے ہوئے کہا کہ مشترکہ جدوجہد سے انتخابی کامیابی حاصل کی جائے گی۔