وزیر اعلیٰ پنجاب مریم نواز شریف اور خاتونِ اول بی بی آصفہ بھٹو زرداری نے اسلام آباد کے پمز اسپتال میں آتشزدگی کے باعث نومولود بچوں کے جاں بحق ہونے پر گہرے رنج و غم کا اظہار کیا ہے۔
ایوان صدر کے پریس ونگ کے مطابق خاتونِ اول نے بدھ کو سماجی رابطے کے پلیٹ فارم ایکس پر اپنے بیان میں سانحے میں جاں بحق ہونے والے نومولود بچوں کے سوگوار خاندانوں سے دلی ہمدردی اور تعزیت کا اظہار کیامعصوم نومولود بچوں کی جانوں کا ضیاع انتہائی دلخراش اور گہرے صدمے کا باعث ہے۔
آصفہ بھٹو زرداری نے متاثرہ خاندانوں کے لیے صبر و حوصلے کی دعا کرتے ہوئے واقعے میں متاثر ہونے والے افراد کی جلد صحت یابی کے لیے بھی دعا کی اور پمز اسپتال میں پیش آنے والے آتشزدگی کے واقعے کی مکمل، فوری اور شفاف تحقیقات کا مطالبہ کیا انہوں نے زور دیا کہ اسپتال کے نظام کو مزید بہتر بنانے اور مستقبل میں اسپتالوں میں اس نوعیت کے المناک سانحات کی روک تھام کے لیے تمام ضروری اقدامات کیے جائیں۔
دوسری جانب وزیراعلیٰ پنجاب مریم نواز نے اسلام آباد کے پمز اسپتال میں پیش آنے والے المناک آتشزدگی کے واقعے پر گہرے دکھ اور افسوس کا اظہار کیا ہے-
سماجی رابطے کی سائٹ ایکس پر ایک بیان میں مریم نواز نے کہاکہ اس دلخراش سانحے نے پوری قوم کو سوگ میں مبتلا کردیا ہے، جس کی تکلیف اور کرب کو الفاظ میں بیان نہیں کیا جاسکتا، ان معصوم جانوں کے ناقابل تلافی نقصان پر وہ سوگوار والدین کے غم میں برابر کی شریک ہیں،مریم نواز نے دعا کی کہ اللہ تعالیٰ تمام سوگوار خاندانوں کو اس صدمے کو برداشت کرنے کی ہمت اور صبرِ جمیل عطا فرمائے۔
واضح رہے کہ پمز اسپتال میں شارٹ سرکٹ کے باعث لگنے والی آگ کے باعث 14 نومولود بچے جاں بحق ہوگئے ہیں،وزیراعظم شہباز شریف نے نوٹس لیتے ہوئے سیکریٹری صحت کو معطل کردیا ہے، جبکہ ذمہ داروں کے تعین کے لیے مزید تحقیقات جاری ہیں۔