پنجاب حکومت نے مالی سال 2026-27 کے بجٹ کے لیے 1220 ارب روپے پر مشتمل ماسٹر اکنامک پلان تیار کر لیا ہے، جس میں معاشی ترقی، انفراسٹرکچر کی بہتری اور سرمایہ کاری کے فروغ کے لیے بڑے منصوبے شامل کیے گئے ہیں۔
ذرائع پنجاب اسمبلی کے مطابق بجٹ تجاویز میں پنجاب ویلتھ فنڈ کے قیام کے لیے 700 ارب روپے مختص کرنے کی سفارش کی گئی ہے۔ اس فنڈ کا مقصد صوبے کے مالی وسائل کو مؤثر انداز میں استعمال کرتے ہوئے طویل المدتی معاشی استحکام کو یقینی بنانا ہے۔میڈیا رپورٹس کے مطابق اسی طرح پنجاب انفرا اسٹرکچر اینڈ گارنٹی فنڈ کے لیے 300 ارب روپے مختص کرنے کی تجویز دی گئی ہے، جس کے ذریعے ترقیاتی منصوبوں اور بنیادی ڈھانچے کی بہتری کے لیے مالی معاونت فراہم کی جائے گی۔ذرائع کے مطابق جنوبی پنجاب میں صنعتی سرگرمیوں کے فروغ کے لیے انڈسٹریل کلسٹرز اور ایگرو پروسیسنگ زونز قائم کرنے کی تجویز بھی بجٹ پلان کا حصہ ہے، جس سے مقامی صنعت، زراعت اور روزگار کے مواقع میں اضافہ متوقع ہے۔
بجٹ دستاویزات میں آئی ٹی انفراسٹرکچر اور جدید ڈیٹا سینٹرز کے قیام کے لیے 30 ارب روپے مختص کرنے کی سفارش کی گئی ہے، جبکہ پاور سیکٹر میں اصلاحات اور نجی سرمایہ کاری کے فروغ کے لیے بھی 30 ارب روپے رکھنے کی تجویز پیش کی گئی ہے۔ذرائع کا کہنا ہے کہ مجوزہ اقتصادی منصوبہ صوبے میں سرمایہ کاری کے ماحول کو بہتر بنانے، صنعتی ترقی کو تیز کرنے اور جدید ٹیکنالوجی کے شعبے کو فروغ دینے کے حکومتی وژن کا اہم حصہ ہے۔