جنوبی وزیرستان کے تحصیل برمل کے علاقے اعظم ورسک میں فتنۃ الخوارج کے دہشتگردوں نے شہریوں پر کواڈ کاپٹر کے ذریعے حملہ کیا، جس کے نتیجے میں 6 سالہ بچہ جاں بحق جبکہ اس کی 9 سالہ بہن سمیت 2 بچے شدید زخمی ہوگئے۔
اعظم ورسک میں دہشتگردوں نے شہری آبادی کو کواڈ کاپٹر حملے کا نشانہ بنایا حملے میں جاں بحق اور زخمی ہونے والے بچے آپس میں بہن بھائی ہیں،زخمی بچوں کو ابتدائی طبی امداد کے لیے ڈسٹرکٹ ہیڈ کوارٹر (ڈی ایچ کیو) اسپتال منتقل کیا گیا، جہاں سے بعد ازاں انہیں مزید علاج کے لیے ڈیرہ اسماعیل خان ریفر کردیا گیا۔
واضح رہے کہ ہے کہ گزشتہ روز ہی ‘فتنہ الخوارج’ نے زیریں جنوبی وزیرستان کی تحصیل ‘توئی خلہ’ میں شہریوں پر کواڈ کاپٹر کے ذریعے حملہ کیا۔ اس حملے میں بچوں سمیت ایک ہی خاندان کے 4 افراد زخمی ہوئے-
فتنۃ الخوارج کی جانب سے معصوم شہریوں، خصوصاً خواتین اور بچوں کو نشانہ بنانا اس گروہ کی بے رحمی اور انسانی جانوں سے بے اعتنائی کو ظاہر کرتا ہےایسے حملوں کی اسلام، شریعت اور بنیادی انسانی اقدار میں کوئی گنجائش نہیں، مقامی لوگوں نے واقعے پر شدید غم و غصے کا اظہار کرتے ہوئے جنوبی وزیرستان اور ملحقہ علاقوں میں غیر مسلح شہریوں، خواتین اور بچوں پر ہونے والے حملوں کی مذمت کی ہے۔
شہریوں پر حملوں کے بعد فتنۃ الخوارج سوشل میڈیا کے ذریعے گمراہ کن معلومات پھیلا کر ریاستی اداروں پر الزام عائد کرنے کی کوشش کرتا ہے تاکہ عوام اور ریاست کے درمیان بداعتمادی پیدا کی جاسکے،انہوں نے کہا کہ شہریوں کے خلاف تشدد اور اس کے بعد گمراہ کن پروپیگنڈا فتنۃ الخوارج کے نام نہاد مذہبی دعوؤں کو بے نقاب کرتا ہے، یہ گروہ نہ اسلام کی نمائندگی کرتا ہے اور نہ انسانیت کی، بلکہ امن و سلامتی کے لیے مسلسل خطرہ ہے، یہ عناصر اپنے بزدلانہ حملوں میں بچوں اور خواتین کو بھی نہیں بخشتے، جو اس بات کا واضح ثبوت ہے کہ ‘فتنہ الخوارج’ اسلام، امن اور انسانیت کے کھلے دشمن ہیں۔