کراچی میں سندھ پولیس اسپورٹس بورڈ کے زیرِ اہتمام سینٹرل پولیس آفس میں تقریب منعقد ہوئی، جس میں قومی کرکٹ ٹیم کے سابق کپتان اور معروف آل راؤنڈر شاہد خان آفریدی کو سندھ پولیس کا سفیرِ کھیل مقرر کردیا گیا۔
تقریب کے دوران شاہد آفریدی کو سفیرِ کھیل مقرر کیے جانے کی سند بھی پیش کی گئی۔ اس موقع پر آئی جی سندھ جاوید عالم اوڈھو اور دیگر حکام بھی موجود تھے۔
تقریب سے خطاب کرتے ہوئے آئی جی سندھ جاوید عالم اوڈھو نے کہا کہ سندھ پولیس اسپورٹس بورڈ کا سفیر بن کر شاہد آفریدی نے پولیس فورس کو اعزاز بخشا ہے۔ انہوں نے کہا کہ سندھ پولیس میں کھیلوں کا فروغ ہمیشہ ترجیحات میں شامل رہا ہے اور پولیس میں کھیلوں کے انعقاد کا خواب طویل عرصے سے دیکھا جارہا تھا۔
آئی جی سندھ کے مطابق رواں سال نومبر میں سندھ پولیس کے زیرِ اہتمام کھیلوں کا ایک بڑا میلہ منعقد کیا جائے گا، جس کا مقصد پولیس اہلکاروں اور نوجوانوں میں کھیلوں کے رجحان کو مزید فروغ دینا ہے۔
اس موقع پر شاہد خان آفریدی نے سندھ پولیس کا سفیرِ کھیل مقرر ہونے پر خوشی کا اظہار کرتے ہوئے کہا کہ بچپن میں ان کا خواب تھا کہ وہ سندھ پولیس کی کرکٹ ٹیم میں شامل ہوکر کھیلیں۔
شاہد آفریدی کا کہنا تھا کہ سندھ پولیس اسپورٹس بورڈ کا سفیر مقرر ہونا ان کے لیے ایک بڑا اعزاز ہے۔ وہ سندھ پولیس کے ساتھ ہر ممکن تعاون جاری رکھیں گے اور کھیلوں کے فروغ کے لیے پولیس کے ساتھ مل کر کام کریں گے۔
انہوں نے کہا کہ نوجوانوں کو کھیلوں کی جانب راغب کرنے، صحت مند اور مثبت سرگرمیوں کو فروغ دینے کے لیے وہ اپنا کردار ادا کرتے رہیں گے۔