فیفا ورلڈ کپ 2026 کے پہلے سیمی فائنل میں اسپین نے شاندار کارکردگی کا مظاہرہ کرتے ہوئے فرانس کو 0-2 سے شکست دے کر 16 سال بعد فائنل کے لیے کوالیفائی کر لیا۔
میچ کے آغاز سے ہی اسپین نے گیند پر بہتر کنٹرول رکھا اور فرانس کی مضبوط دفاعی لائن کو مسلسل آزماتا رہا، اسپین کی جانب سے پہلا گول پیڈرو پورو نے کیا ،دوسرے ہاف میں اسپین نے اپنی برتری کو مزید مستحکم کرتے ہوئے ایک اور خوبصورت حملہ ترتیب دیا، جس کا اختتام میکل اویارزابال کے گول پر ہوا ،ا س گول کے بعد فرانس پر دباؤ مزید بڑھ گیا، لیکن عالمی چیمپئن رہنے والی فرانسیسی ٹیم میچ میں واپسی کا کوئی راستہ نہ نکال سکی اور مقررہ وقت کے اختتام پر اسپین نے 0-2 سے کامیابی اپنے نام کرلی۔
اس کامیابی کے ساتھ اسپین نے 16 برس بعد فیفا ورلڈ کپ کے فائنل میں رسائی حاصل کی ہے، اس سے قبل اسپین نے 2010 میں جنوبی افریقا میں ہونے والے ورلڈ کپ کے فائنل میں نیدرلینڈز کو شکست دے کر اپنی تاریخ کا پہلا عالمی ٹائٹل جیتا تھا۔
دوسری جانب فرانس کے لیے یہ شکست خاصی مایوس کن ثابت ہوئی، کیونکہ ٹیم مسلسل تیسری مرتبہ ورلڈ کپ کا فائنل کھیلنے کی خواہش پوری نہ کر سکی، فرانسیسی کھلاڑیوں نے بھرپور کوشش کی، لیکن اسپین کی منظم حکمت عملی اور مؤثر کھیل کے سامنے وہ بے بس دکھائی دیے۔
اب اسپین کی نظریں فیفا ورلڈ کپ 2026 کے فائنل پر مرکوز ہیں، جہاں وہ دوسرے سیمی فائنل کی فاتح ٹیم سے ٹکرائے گا۔ شائقین فٹبال کو امید ہے کہ اسپین اپنی شاندار فارم برقرار رکھتے ہوئے ایک بار پھر عالمی چیمپئن بننے کی کوشش کرے گا، جبکہ فرانس تیسری پوزیشن کے میچ میں بہتر اختتام کے لیے میدان میں اترے گا۔
فیفا ورلڈ کپ 2026 کے دوسرے سیمی فائنل کی دیوانگی عروج پر پہنچ گئی، ارجنٹائن اور انگلینڈ کے درمیان ہونے والے ہائی پروفائل مقابلے کے لیے شائقین کی غیرمعمولی دلچسپی کے باعث ٹکٹوں کی قیمتیں دوگنی ہو گئیں۔
امریکی میڈیا کے مطابق سیمی فائنل کا وہ ٹکٹ جو چند روز قبل 1326 ڈالر میں دستیاب تھا، اب ری سیل مارکیٹ میں 2867 ڈالر تک فروخت ہو رہا ہے۔ پاکستانی کرنسی میں اس کی مالیت تقریباً 7 لاکھ 93 ہزار روپے بنتی ہے، جبکہ بہتر نشستوں کے ٹکٹ اس سے بھی زیادہ قیمت پر فروخت کیے جا رہے ہیں۔
فیفا ورلڈ کپ کا دوسرا سیمی فائنل بدھ اور جمعرات کی درمیانی شب امریکی شہر اٹلانٹا کے مرسیڈیز بینز اسٹیڈیم میں کھیلا جائے گا، جہاں دفاعی چیمپئن ارجنٹائن کا مقابلہ انگلینڈ سے ہوگا میچ میں ایک جانب8 بار کے بیلن ڈی اور فاتح لیونل میسی اپنی ٹیم کی قیادت کریں گے، جبکہ دوسری جانب انگلینڈ کے کپتان اور تجربہ کار اسٹرائیکر ہیری کین ٹیم کو فائنل تک پہنچانے کے لیے میدان میں اتریں گے۔ دونوں عالمی شہرت یافتہ کھلاڑیوں کے درمیان ممکنہ مقابلہ شائقین کی توجہ کا مرکز بنا ہوا ہے۔