لاہور: پاکستان ایئرپورٹس اتھارٹی (پی اے اے) نے مون سون سیزن کے دوران لاہور ایئرپورٹ پر فضائی حفاظت کو یقینی بنانے کے لیے خصوصی آپریشنل اقدامات نافذ کر دیے ہیں۔
اس حوالے سے جاری کیے گئے نوٹم میں پائلٹس کو پرندوں کی بڑھتی ہوئی سرگرمی کے باعث غیر معمولی احتیاط برتنے کی ہدایت کی گئی ہے۔نوٹم کے مطابق حفاظتی اقدامات کے تحت 15 ستمبر تک روزانہ صبح 5 بج کر ایک منٹ سے 8 بجے تک ایئرپورٹ کی رن ویز معمول کی پروازوں کے لیے دستیاب نہیں ہوں گی۔ اس دوران رن ویز پر برڈ ہیزرڈ کے خطرات کو کم کرنے کے لیے خصوصی انتظامات کیے جائیں گے۔پاکستان ایئرپورٹس اتھارٹی کا کہنا ہے کہ ان عارضی آپریشنل اقدامات کے باعث شیڈول کمرشل پروازیں متبادل اوقات میں آپریٹ کی جائیں گی تاکہ مسافروں کو کم سے کم مشکلات کا سامنا کرنا پڑے۔
پی اے اے نے واضح کیا ہے کہ اگرچہ معمول کی پروازوں کے شیڈول میں عارضی ردوبدل کیا گیا ہے، تاہم کسی بھی ہنگامی صورتحال میں طیاروں کی لینڈنگ کی سہولت بدستور دستیاب رہے گی۔