امریکی صدر ڈونلڈ ٹرمپ نے امریکا کی آزادی کی 250 ویں سالگرہ کی مناسبت سے ایک انتہائی منفرد اور محدود تعداد میں جاری کیے جانے والے خصوصی امریکی پاسپورٹ کا ڈیزائن جاری کر دیا ہے، جس میں ان کی اپنی تصویر نمایاں طور پر شامل کی گئی ہے۔
صدر ٹرمپ نے اپنے سوشل میڈیا پلیٹ فارم ’ٹروتھ سوشل‘ پر اس نئے پاسپورٹ کی تصویر شیئر کرتے ہوئے لکھا کہ امریکا کا نیا پاسپورٹ، جس پر لکھا ہے، خوش آمدید، مگر اچھا رویہ اختیار کریں ۔
جاری کردہ ڈیزائن کے مطابق پاسپورٹ پر صدر ڈونلڈ ٹرمپ کو سنجیدہ انداز میں اپنی میز کے ساتھ کھڑا دکھایا گیا ہے اور اس پر ان کے دستخط بھی موجود ہیں،اس تصویر کے پس منظر میں امریکا کے تاریخی ’اعلانِ آزادی‘ کا متن شامل کیا گیا ہے پاسپورٹ کے دوسرے صفحے پر 1776 میں اعلانِ آزادی پر دستخط کی تاریخی منظرکشی کی گئی ہے، جہاں واضح طور پر ’یونائٹڈ اسٹیٹ آف امریکا‘ درج ہے،اگر یہ خصوصی پاسپورٹ منصوبے کے مطابق جولائی میں جاری کر دیا جاتا ہے، تو ڈونلڈ ٹرمپ امریکا کی ڈھائی سو سالہ تاریخ میں وہ پہلے حاضر سروس صدر بن جائیں گے جن کی تصویر امریکی شہریوں کی باقاعدہ سفری دستاویزات (پاسپورٹ) کا حصہ بنے گی۔
میڈیا رپورٹس کے مطابق، پاسپورٹ پر موجود یہ تصویر وائٹ ہاؤس کے آفیشل فوٹوگرافر ڈینیئل ٹوروک کی لی گئی ایک سرکاری تصویر پر مبنی ہے وائٹ ہاؤس نے بھی اس ڈیزائن کو سوشل میڈیا پر شیئر کرتے ہوئے اسے باقاعدہ طور پر ‘پیٹریاٹ پاسپورٹ’ کا نام دیا ہے امریکی محکمہ خارجہ کے ایک عہدیدار کے مطابق، ٹرمپ تھیم پر مبنی یہ خصوصی یادگاری پاسپورٹ 6 جولائی سے دستیاب ہوں گے تاہم یہ پاسپورٹ ہر شہری کو نہیں ملیں گے بلکہ یہ صرف واشنگٹن میں بالمشافہ اپائنٹمنٹ کے ذریعے، انتہائی محدود تعداد میں فراہم کیے جائیں گے۔
صدر ٹرمپ حالیہ عرصے میں مختلف امریکی سرکاری اداروں اور اشیا پر اپنی ذاتی شناخت نمایاں کرنے کے اقدامات کر رہے ہیں واشنگٹن میں متعدد سرکاری عمارتوں پر پہلے ہی ان کے بینرز آویزاں کیے جا چکے ہیں، جبکہ امریکی محکمہ خزانہ نے بھی اعلان کیا ہے کہ جلد ہی ایک ڈالر کے نوٹ پر صدر ٹرمپ کے دستخط شامل کیے جائیں گے۔