یوگنڈا نے پاکستانی سرمایہ کاروں کو زراعت، معدنیات، توانائی اور سیاحت کے شعبوں میں سرمایہ کاری کی دعوت دیتے ہوئے 25 سال تک کی شاندار ٹیکس چھوٹ کی پیشکش کر دی ہے۔
اسلام آباد چیمبر آف کامرس اینڈ انڈسٹری (آئی سی سی آئی) میں ہونے والے اجلاس میں اتفاق کیا گیا کہ پاکستان اور یوگنڈا کے تعلقات اب محض سفارتی خیر سگالی تک محدود نہیں رہنے چاہییں بلکہ انہیں مضبوط تجارتی شراکت داری میں بدلنا ہوگا۔
یوگنڈا کے ناظم الامور سفیر متتا تواہانے ہفتے کے روز اسلام آباد چیمبر آف کامرس میں تاجروں کے ایک اجلاس سے خطاب کرتے ہوئے کہا کہ ان کا ملک پاکستانی تاجروں کو سرمایہ کاری اور براہ راست تجارتی روابط قائم کرنے میں ہر ممکن سہولت فراہم کرنے کے لیے تیار ہے۔
اس موقع پر یوگنڈا میں پاکستان کے ڈپٹی ہائی کمشنر بلال محسن نے بتایا کہ یوگنڈا کی جانب سے 10 سالہ ٹیکس ہالیڈے کی پیشکش کی جا رہی ہے، جبکہ گرین فیلڈ منصوبوں کے سرمایہ کار 25 سال تک کی ٹیکس مراعات سے فائدہ اٹھا سکتے ہیں۔
یوگنڈا کے سفیر نے اس بات پر زور دیا کہ دیرینہ سفارتی بنیادوں کے باوجود دونوں ممالک کے تعلقات کو وسیع تر تجارت اور سرمایہ کاری میں بدلنے کی ضرو رت ہے پاکستانی تاجروں کا ایک وفد اکتوبر میں یوگنڈا کا دورہ کرے، جہاں وہ ایک ہفتے کے بزنس فورم میں شرکت کے علاوہ چائے، کافی، کوکو اور کپا س کے فارمز کا براہ راست جائزہ لے، یوگنڈا کی ‘اقتصادی و کمرشل ڈپلومیسی حکمت عملی 2025’ کے تحت ان کا مشن دوست ممالک کے ساتھ تجارتی و معا شی تعاون کو فروغ دے رہا ہے۔
انہوں نے اسلام آباد یا کمپالا میں پہلی پاک یوگنڈا تجارتی نمائش منعقد کرنے اور دونوں ممالک کے چیمبرز کے درمیان ادارہ جاتی تعاون کے لیے باضابطہ میکانزم بنانے کی تجویز دی کہا کہ سفارتکاری دروازے کھولتی ہے مگر گزرنا کاروبار کو پڑتا ہے۔
آئی سی سی آئی کے صدر سردار طاہر محمود نے کہا کہ افریقہ کے ساتھ پاکستان کے تعلقات کو اب ایک متحرک تجارتی، تکنیکی اور معاشی شراکت داری کی طرف لے جانا ہوگا پاکستان سے چاول، ادویات، ٹیکسٹائل، سرجیکل آلات، کھیلوں کے سامان اور انجینیئرنگ مصنوعات کو برآمدات کے لیے بہترین قرار دیا، جبکہ یوگنڈا سے کافی، چائے اور زرعی اجناس درآمد کی جا سکتی ہیں،سفارت کاری دروازے تو کھول سکتی ہے، لیکن ان دروازوں سے گزر کر اصل منزل تک کاروبار ہی پہنچتا ہے۔
سابق صدر آئی سی سی آئی ظفر بختاوری نے اجلاس میں بتایا کہ چیمبر ہمیشہ سے پاک افریقہ تعلقات کی مضبوطی کا حامی رہا ہے اور اسی مقصد کے تحت ہر سال ‘افریقہ ڈے’ منایا جاتا ہے انہوں نے دونوں ممالک کے درمیان براہ راست فضائی رابطے قائم کرنے اور اسلام آباد میں یوگنڈا کا باقاعدہ سفارتی مشن قائم کرنے پر بھی زور دیا تاکہ مستقبل میں تجارتی اہداف کو باآسانی اور تیزی سے حاصل کیا جا سکے۔