فرانس کے شمال مشرقی علاقے ٹومبلین میں اتوار کے روز ایک تربیتی طیارہ گر کر تباہ ہو گیا، جس کے نتیجے میں پائلٹ سمیت تمام 11 افراد ہلاک ہو گئے۔ مقامی انتظامیہ نے حادثے کی تصدیق کرتے ہوئے بتایا کہ طیارے میں سوار کوئی بھی شخص زندہ نہ بچ سکا۔
حکام کے مطابق حادثے کا شکار ہونے والا Pilatus PC-6/B2-H4 Turbo Porter طیارہ ایک اسکائی ڈائیونگ اسکول کی ملکیت تھا۔ طیارے میں ایک پائلٹ، پانچ زیر تربیت طلبہ اور پانچ انسٹرکٹرز سوار تھے، جو اسکائی ڈائیونگ کی تربیت کے سلسلے میں پرواز کر رہے تھے۔
یہ حادثہ ٹومبلین ایئرپورٹ کے قریب پیش آیا، جو فرانس کے شہر نینسی کے نزدیک واقع ہے۔ طیارہ گرنے کے فوراً بعد ریسکیو، فائر بریگیڈ اور پولیس کی ٹیمیں جائے حادثہ پر پہنچ گئیں اور علاقے کو گھیرے میں لے لیا گیا۔
پولیس نے شہریوں سے اپیل کی ہے کہ وہ امدادی کارروائیوں میں رکاوٹ سے بچنے کے لیے حادثے کے مقام سے دور رہیں اور غیر ضروری طور پر اس علاقے کا رخ نہ کریں۔
ابتدائی اطلاعات کے مطابق طیارہ گرنے کی وجوہات فوری طور پر معلوم نہیں ہو سکیں۔ فرانسیسی حکام نے واقعے کی مکمل تحقیقات شروع کر دی ہیں اور ماہرین جائے حادثہ سے شواہد اکٹھے کر رہے ہیں تاکہ حادثے کی اصل وجہ کا تعین کیا جا سکے۔
حادثے کے بعد مقامی انتظامیہ نے متاثرہ خاندانوں سے اظہار تعزیت کیا ہے، جبکہ ایوی ایشن حکام نے یقین دہانی کرائی ہے کہ تحقیقات مکمل ہونے کے بعد رپورٹ عوام کے سامنے پیش کی جائے گی۔
فرانس میں اسکائی ڈائیونگ طیارہ گر کر تباہ، 11 افراد ہلاک
