کانپور: بھارتی ریاست اتر پردیش کے شہر کانپور میں محبت کا ایک عجیب و غریب واقعہ سامنے آیا ہے، جہاں ایک نوجوان کو اپنے سے 13 سال بڑی اور تین بچوں کی ماں سے محبت کرنا مہنگا پڑ گیا۔ خاتون سے ملاقات کے لیے گاؤں پہنچنے والے نوجوان کو اہلِ خانہ نے پکڑ کر مبینہ طور پر تشدد کا نشانہ بنایا اور تقریباً 30 گھنٹے تک ایک کمرے میں قید رکھا۔
رپورٹ کے مطابق واقعہ کانپور کے ساڑ تھانہ علاقے کے چھانجا گاؤں میں پیش آیا۔ نوجوان اپنی خاتون دوست سے ملنے وہاں پہنچا تھا، تاہم اہلِ خانہ نے اسے پکڑ لیا۔ خاتون کی عمر نوجوان سے 13 سال زیادہ بتائی گئی ہے اور وہ تین بچوں کی ماں ہے۔اہلِ خانہ نے نوجوان کا موبائل فون بھی چھین لیا اور اسے ایک کمرے میں بند کر دیا۔ نوجوان تقریباً 30 گھنٹے تک قید رہا۔ دوسری جانب خاتون اپنے دوست کی سلامتی کے حوالے سے پریشان ہوگئی اور اسے خدشہ ہوا کہ نوجوان کے ساتھ کوئی ناخوشگوار واقعہ پیش آسکتا ہے۔خاتون موقع ملنے پر ساڑ تھانے پہنچ گئی اور پولیس کو صورتِ حال سے آگاہ کیا۔ اطلاع ملتے ہی پولیس گاؤں پہنچی اور نوجوان کو کمرے سے باہر نکالا۔ پولیس نے نوجوان اور خاتون کو اپنی گاڑی میں بٹھا کر تھانے منتقل کرنے کی کوشش کی تو گاؤں والے مشتعل ہوگئے۔رپورٹ کے مطابق مشتعل افراد نے پولیس کی گاڑی کو گھیر لیا اور دونوں کو لے جانے کی مخالفت کی۔ اس دوران پولیس اہلکاروں اور گاؤں والوں کے درمیان تلخ کلامی، دھکم پیل اور ہاتھا پائی شروع ہوگئی، جبکہ بعض خواتین نے نوجوان کو پولیس کی گاڑی سے اتارنے کی کوشش بھی کی۔صورتحال کشیدہ ہونے پر نوجوان کو بچانے کے لیے پہنچنے والے سب انسپکٹر آشیِش سنگھ سے بھی خواتین کی جھڑپ ہوگئی۔ ہنگامہ بڑھنے پر ساڑ پولیس نے قریبی تھانوں سے اضافی نفری طلب کی۔ کافی کوشش کے بعد پولیس دونوں کو بحفاظت تھانے لے جانے میں کامیاب ہوگئی۔
پولیس کے ساتھ مبینہ ہاتھا پائی کے معاملے میں 11 نامزد افراد سمیت دیگر افراد کے خلاف ایف آئی آر درج کرلی گئی ہے، جبکہ پولیس نے واقعے کی مزید تحقیقات شروع کردی ہیں