ترجمان دفتر خارجہ طاہر حسین اندرابی نے کہا ہے کہ وزیراعظم شہباز شریف خطے کی موجودہ صورتحال کے پیش نظر اہم عالمی اور علاقائی رہنماؤں سے مسلسل رابطے میں ہیں۔ انہوں نے بتایا کہ وزیراعظم نے ایران اور سعودی عرب کی قیادت سے بات چیت کی ہے، جس کا مقصد خطے میں امن اور استحکام کو فروغ دینا ہے۔
ترجمان کے مطابق وزیراعظم نے یورپی کونسل کے صدر سے بھی گفتگو کی، جس میں عالمی صورتحال اور سفارتی کوششوں پر تبادلہ خیال کیا گیا۔ انہوں نے کہا کہ پاکستان خطے میں امن کے قیام کے لیے اپنا کردار بھرپور طریقے سے ادا کر رہا ہے اور تمام فریقین کے ساتھ رابطے جاری رکھے ہوئے ہے۔
طاہر حسین اندرابی نے مزید بتایا کہ ترکی کے صدر رجب طیب اردوان نے وزیراعظم شہباز شریف کی امن کے لیے کی جانے والی کوششوں کو سراہا ہے۔ انہوں نے پاکستان کے کردار کو مثبت قرار دیتے ہوئے خطے میں کشیدگی کم کرنے کی کوششوں کی تعریف کی۔
ترجمان کا کہنا تھا کہ سعودی عرب نے پاکستان کی معاشی استحکام میں اہم کردار ادا کیا ہے اور دونوں ممالک کے درمیان برادرانہ تعلقات قائم ہیں۔ انہوں نے اس بات پر زور دیا کہ پاکستان، سعودی عرب اور دیگر دوست ممالک کے ساتھ اپنے تعلقات کو مزید مضبوط بنانے کے لیے پرعزم ہے۔
انہوں نے کہا کہ موجودہ حالات میں سفارتی روابط نہایت اہم ہیں اور پاکستان کی کوشش ہے کہ خطے میں کشیدگی کو کم کر کے پائیدار امن کی راہ ہموار کی جائے۔
وزیراعظم کے ایران، سعودی قیادت سے رابطے، امن کوششوں کی تعریف
