نائب وزیرِ اعظم اور وزیرِ خارجہ اسحاق ڈار نے کہا ہے کہ سنگاپور کے قریب امریکی حکام کی تحویل میں موجود جہازوں پر موجود پاکستانی اور ایرانی سمندری عملے کی باحفاظت وطن واپسی کے لیے سفارتی سطح پر مسلسل رابطے جاری ہیں۔
دفترِ خارجہ کے مطابق اسحاق ڈار نے سنگاپور کے وزیرِ خارجہ ویوین بالاکرشنن سے ٹیلیفونک رابطہ کیا، جس میں اس معاملے پر تفصیلی بات چیت کی گئی۔ گفتگو کے دوران پاکستانی اور ایرانی ملاحوں کی محفوظ واپسی کے لیے تعاون پر زور دیا گیا۔اسحاق ڈار نے امریکی حکام کی تحویل سے 11 پاکستانی اور 20 ایرانی بحری کارکنوں کی جلد واپسی کے لیے خصوصی درخواست بھی کی ہے۔نائب وزیرِ اعظم نے سماجی رابطے کی ویب سائٹ ’ایکس‘ پر اپنے بیان میں بتایا کہ انہوں نے اس حوالے سے ایرانی وزیرِ خارجہ عباس عراقچی سے بھی رابطہ کیا ہے، اور دونوں ممالک اس صورتحال پر قریبی رابطے میں ہیں۔انہوں نے کہا کہ پاکستان ایرانی شہریوں کی پاکستان کے راستے ایران واپسی کے لیے ہر ممکن سہولت فراہم کرنے کو تیار ہے۔
اسحاق ڈار نے اس معاملے پر سنگاپور کی حکومت کے تعاون کو سراہتے ہوئے کہا کہ پاکستان کا دفترِ خارجہ اور متعلقہ ادارے امریکی حکام سمیت تمام فریقین سے مسلسل رابطے میں ہیں تاکہ تمام متاثرہ شہریوں کی حفاظت، فلاح و بہبود اور جلد از جلد وطن واپسی کو یقینی بنایا جا سکے۔