ڈسٹرکٹ اینڈ سیشن کورٹس اسلام آباد نے ریاستی اداروں پر الزامات لگانے کے مقدمے میں وزیراعلیٰ خیبر پختونخوا سہیل آفریدی کو گرفتار کرکے عدالت میں پیش کرنے کا حکم دے دیا۔
سول جج عباس شاہ نے کیس کی سماعت کے دوران وزیراعلیٰ خیبر پختونخوا کی مسلسل عدم حاضری پر برہمی کا اظہار کرتے ہوئے ان کے ناقابلِ ضمانت وارنٹِ گرفتاری برقرار رکھے۔ عدالت نے متعلقہ حکام کو ہدایت کی کہ سہیل آفریدی کو گرفتار کرکے آئندہ سماعت پر پیش کیا جائے،سہیل آفریدی کے خلاف پیکا ایکٹ کے تحت مقدمہ نیشنل سائبر کرائم انویسٹی گیشن ایجنسی (این سی سی آئی اے) کی جانب سے درج کیا گیا تھا، جس میں ان پر ریاستی اداروں کے خلاف الزامات لگانے کا الزام عائد کیا گیا ہے۔
سماعت کے دوران عدالت کو ملزم کی عدم پیشی سے متعلق آگاہ کیا گیا، جس کے بعد عدالت نے وارنٹِ گرفتاری برقرار رکھنے کا فیصلہ سنایا۔عدالت نے مقدمے کی مزید سماعت 18 جون تک ملتوی کر دی، جبکہ قانون نافذ کرنے والے اداروں کو عدالتی احکامات پر عملدرآمد یقینی بنانے کی ہدایت بھی کی گئی۔