اسلام آباد میں وزیراعظم سے ایم کیو ایم پاکستان کے وفد کی اہم ملاقات ہوئی، جس میں پارٹی کی جانب سے شہری سندھ سے متعلق مختلف مطالبات اور آئینی امور پر تفصیلی گفتگو کی گئی۔
ملاقات میں ایم کیو ایم پاکستان کے کنوینر خالد مقبول صدیقی، مصطفیٰ کمال، فاروق ستار اور امین الحق شریک ہوئے، جبکہ نائب وزیراعظم اسحاق ڈار اور رانا ثناء اللہ بھی موجود تھے۔ایم کیو ایم ذرائع کے مطابق وفد نے وزیراعظم کے سامنے چار اہم نکات پیش کیے۔ پارٹی نے شہری علاقوں کے لیے خصوصی ترقیاتی پیکج کا مطالبہ کیا اور بلدیاتی حکومتوں سے متعلق مجوزہ آئینی ترمیم پر بھی اپنے تحفظات اور تجاویز پیش کیں۔ذرائع کے مطابق ملاقات میں سندھ کی گورنرشپ، بلدیاتی اختیارات اور ایم کیو ایم کے لاپتا کارکنان کی بازیابی کے معاملات بھی زیرِ بحث آئے۔ وفد نے لاپتا کارکنان کے مسئلے کے حل کے لیے حکومتی سطح پر مؤثر اقدامات کا مطالبہ کیا۔
ذرائع کا کہنا ہے کہ وزیراعظم نے ایم کیو ایم کے مجوزہ آئینی بل کا جائزہ لینے اور لاپتا کارکنان کے معاملے پر ایک خصوصی کمیٹی قائم کرنے کی ہدایت جاری کر دی ہے۔ ملاقات کو وفاقی حکومت اور ایم کیو ایم پاکستان کے درمیان جاری سیاسی رابطوں میں اہم پیش رفت قرار دیا جا رہا ہے۔