پاکستان پیپلز پارٹی کے چیئرمین بلاول بھٹو زرداری نے آزاد جموں و کشمیر میں آئینی، سیاسی اور انتظامی اصلاحات پر زور دیتے ہوئے کہا ہے کہ خطے کو درپیش موجودہ بحران کی بنیادی وجہ سیاسی معاملات کو درست انداز میں نہ سنبھالنا اور وفاقی وزرا کے بعض غیر ذمہ دارانہ بیانات ہیں۔
ایک تقریب سے خطاب کرتے ہوئے بلاول بھٹو زرداری نے کہا کہ آزاد کشمیر کے مسائل کا حل کشمیری عوام کو خود نکالنا چاہیے۔ ان کا کہنا تھا کہ اسلام آباد میں بیٹھے افراد کو یہ فیصلہ کرنے کا اختیار نہیں کہ کون کشمیری ہے اور کون نہیں۔
انہوں نے حالیہ واقعات کی تحقیقات کے لیے مکمل اختیارات رکھنے والے ایک آزاد کمیشن کے قیام کی تجویز پیش کی۔ ان کے مطابق آئندہ آزاد کشمیر انتخابات کے بعد ایک آئینی کنونشن بھی بلایا جا سکتا ہے، جہاں مخصوص نشستوں سمیت دیگر آئینی اور سیاسی معاملات پر مشاورت کے ذریعے اتفاقِ رائے پیدا کیا جائے۔
بلاول بھٹو نے کہا کہ آئینی ترامیم زبردستی نافذ نہیں کی جا سکتیں بلکہ ایسے فیصلے عوامی مشاورت اور سیاسی اتفاق سے ہونے چاہییں۔ انہوں نے پرامن احتجاج کے حق کی حمایت کرتے ہوئے واضح کیا کہ تشدد پر مبنی احتجاج کسی صورت قابل قبول نہیں۔
چیئرمین پیپلز پارٹی نے کہا کہ پاکستان کی مسلح افواج ملک کی "ریڈ لائن” ہیں اور کشمیر کے اندر سے بھی پاکستان یا افواجِ پاکستان کے خلاف کوئی بیان قابل قبول نہیں ہو سکتا۔ انہوں نے فیلڈ مارشل سید عاصم منیر کی قیادت کو سراہتے ہوئے کہا کہ دنیا ان کی عسکری صلاحیتوں کو تسلیم کر چکی ہے اور ان کی قیادت میں پاکستان بھارت اور اسرائیل کے اقدامات کا مؤثر جواب دے رہا ہے۔
اپنے خطاب میں بلاول بھٹو نے دریائے سندھ کے پانی کے معاملے پر بھی دوٹوک مؤقف اختیار کرتے ہوئے کہا کہ پاکستان اپنے آبی حقوق پر کسی قسم کا سمجھوتہ نہیں کرے گا۔ انہوں نے بھارتی وزیراعظم نریندر مودی پر الزام عائد کیا کہ وہ پانی کو بطور ہتھیار استعمال کرنے کی کوشش کر رہے ہیں۔
آزاد کشمیر کے مسائل کشمیری خود حل کریں، بلاول بھٹو کا آئینی اصلاحات کا مطالبہ
