ممبئی: بالی ووڈ اداکارہ امیشا پٹیل کے گھر سے مبینہ طور پر تقریباً 5 لاکھ بھارتی روپے مالیت کے زیورات چوری ہوگئے، پولیس نے چوری کے الزام میں گھریلو ملازمہ کو گرفتار کرلیا۔
بھارتی میڈیا رپورٹس کے مطابق امیشا پٹیل کا گھر ممبئی کے چرچ گیٹ کے علاقے میں واقع ہے، جہاں ان کے والدین رہائش پذیر ہیں۔ پولیس کے مطابق گھر سے قیمتی زیورات غائب ہونے کی اطلاع کے بعد تحقیقات شروع کی گئیں۔پولیس نے بتایا کہ چوری کے الزام میں گرفتار ملزمہ کی شناخت 40 سالہ سیما گھاٹے کے نام سے ہوئی ہے، جو تقریباً ڈیڑھ سال سے امیشا پٹیل کے والدین کے گھر میں گھریلو ملازمہ کے طور پر کام کر رہی تھی۔امیشا پٹیل کی والدہ آشا پٹیل کی شکایت پر میرین ڈرائیو پولیس نے مبینہ چوری کی تحقیقات شروع کیں اور سیما گھاٹے کو حراست میں لے لیا۔
پولیس کے مطابق آشا پٹیل کو سیما گھاٹے پر چوری میں ملوث ہونے کا شبہ تھا اور وہ تقریباً 5 سے 6 ماہ تک مبینہ طور پر اس سے چوری کا اعتراف کرنے اور زیورات واپس کرنے کا مطالبہ کرتی رہیں، تاہم زیورات واپس نہ کیے جانے پر انہوں نے پولیس سے رجوع کیا۔سیما گھاٹے کو گرفتار کرکے عدالت میں پیش کیا گیا، جہاں عدالت نے ملزمہ کو 15 ستمبر تک پولیس ریمانڈ پر بھیج دیا۔