اسلام آباد: پاکستان تحریک انصاف کے چیئرمین بیرسٹر گوہر نے بانی پی ٹی آئی کی صحت اور ان سے منسوب حالیہ خبروں پر وضاحتی بیان جاری کرتے ہوئے کہا ہے کہ انہوں نے بانی پی ٹی آئی کی جانب سے نہ کوئی پیغام وصول کیا ہے اور نہ ہی کوئی بیان جاری کیا ہے۔
بیرسٹر گوہر نے کہا کہ بانی پی ٹی آئی یا بشریٰ بی بی کی جانب سے بیرسٹر سیف سے ملاقات کی خواہش کے حوالے سے انہیں کوئی اطلاع موصول نہیں ہوئی۔ انہوں نے واضح کیا کہ اس معاملے میں ہونے والی کسی بھی رابطہ کاری یا ملاقات سے وہ لاعلم ہیں۔
انہوں نے مزید کہا کہ بانی پی ٹی آئی یا بشریٰ بی بی کی طرف سے اس حوالے سے انہیں کوئی ہدایت یا پیغام نہیں ملا، اس لیے زیر گردش اطلاعات کو ان سے منسوب کرنا درست نہیں۔
دوسری جانب پاکستان تحریک انصاف نے وزیراعظم شہباز شریف کی جانب سے 2018 کے عام انتخابات کی تحقیقات کے چیلنج کو قبول کرتے ہوئے مطالبہ کیا ہے کہ صرف 2018 ہی نہیں بلکہ 2014 اور 2024 کے انتخابات کی بھی غیر جانبدارانہ اور جامع تحقیقات کرائی جائیں۔
پی ٹی آئی کے ترجمان کا کہنا ہے کہ پارٹی ہر قسم کی شفاف تحقیقات کے لیے تیار ہے تاکہ تمام انتخابی عمل کا غیر جانبدارانہ جائزہ لیا جا سکے اور حقائق قوم کے سامنے لائے جائیں۔
بانی پی ٹی آئی کی صحت سے متعلق خبروں پر بیرسٹر گوہر کی وضاحت
