ملک کے مختلف علاقوں مزید بارشوں کی پیشگوئی

محکمہ موسمیات نے آج بھی خیبر پختونخوا، پنجاب اور آزاد کشمیر کے بالائی علاقوں میں مزید بارشوں کی پیشگوئی کی ہے۔

ملک کے مختلف علاقوں میں بارش اور بعض مقامات پر ژالہ باری ریکارڈ کی گئی ہے، جس سے موسم میں واضح ٹھنڈک بڑھ گئی ہے،خیبر پختونخوا میں سوات، کرک، ملاکنڈ، ایبٹ آباد اور مانسہرہ میں بارش ہوئی، جبکہ گلیات اور وادی ناران میں برفباری کے باعث سردی کی شدت میں اضافہ ہو گیا۔

وادی نیلم میں لینڈ سلائیڈنگ کے باعث مرکزی شاہراہ کیل شیخ بیلہ کے مقام پر بند ہو گئی، جس کے نتیجے میں سیاحوں کی 20 سے زائد گاڑیاں پھنس گئیں، متعدد مسافروں کو قریبی آبادی میں عارضی رہائش فراہم کر دی گئی ہے جبکہ ملک کے بالائی علاقوں میں آج بھی بارشوں کا سلسلہ جاری رہنے کا امکان ہے، جبکہ پہاڑی علاقوں میں مزید برفباری بھی متوقع ہے۔ شہریوں اور سیاحوں کو احتیاط برتنے کی ہدایت کی گئی ہے۔