مظفرآباد سمیت آزاد و مقبوضہ جموں و کشمیر اور ملک بھر میں تحریک آزادی کشمیر کے معروف حریت رہنما سید علی شاہ گیلانی کی پانچویں برسی آج انتہائی عقیدت و احترام اور تجدیدِ عہد کے ساتھ منائی جا رہی ہے۔ اس موقع پر کشمیری عوام نے ان کی جدوجہد، قربانیوں اور حقِ خودارادیت کے لیے دی جانے والی خدمات کو خراج عقیدت پیش کیا۔
سید علی گیلانی نے اپنی زندگی کی تقریباً سات دہائیاں کشمیری عوام کے حقِ خودارادیت کے لیے جدوجہد میں گزاریں۔ ان کی سیاسی زندگی کا بنیادی محور کشمیر کی آزادی اور کشمیری عوام کے حقِ خودارادیت کا حصول تھا۔ وہ اپنی زندگی کے آخری لمحات تک اپنے مؤقف پر قائم رہے اور پاکستان سے اپنی وابستگی کا اظہار کرتے رہے۔
سید علی گیلانی کے لیے تحریک آزادی محض سیاسی سرگرمی نہیں بلکہ ان کے ایمان، اصول اور شناخت کا حصہ تھی۔ انہوں نے کم عمری میں سیاست میں قدم رکھا اور بعد ازاں مقبوضہ جموں و کشمیر کے اہم سیاسی پلیٹ فارمز پر فعال کردار ادا کیا۔ وہ 1972، 1977 اور 1987 میں مقبوضہ جموں و کشمیر کی قانون ساز اسمبلی کے رکن بھی منتخب ہوئے۔
تاہم بعد ازاں انہوں نے بھارتی پالیسیوں اور مقبوضہ کشمیر کی صورتحال کے خلاف اپنے سیاسی مؤقف کو مزید واضح انداز میں پیش کیا اور اپنی زندگی کا بڑا حصہ تحریک آزادی کشمیر کے لیے وقف کردیا۔ بھارتی حکام کی جانب سے گرفتاریوں، پابندیوں اور نظربندی کے باوجود وہ اپنے مؤقف سے پیچھے نہیں ہٹے۔
سید علی گیلانی نے زندگی کے آخری 11 سال سری نگر کے علاقے حیدرپورہ میں اپنی رہائش گاہ پر نظر بندی کی حالت میں گزارے۔ مسلسل قید و تنہائی، صحت کے مسائل اور مختلف پابندیاں بھی ان کے سیاسی مؤقف اور حقِ خودارادیت کے مطالبے کو تبدیل نہ کرسکیں۔
وہ یکم ستمبر 2021 کو حیدرپورہ میں اپنی رہائش گاہ پر نظر بندی کے دوران انتقال کرگئے۔ ان کے انتقال کے بعد ان کی تدفین پاکستانی پرچم میں کی گئی۔
سید علی گیلانی کا مشہور نعرہ ’’ہم پاکستانی ہیں، پاکستان ہمارا ہے‘‘ کشمیری سیاست میں ان کی شناخت بن گیا۔ ان کے حامیوں کے مطابق اس نعرے نے کشمیری عوام میں پاکستان سے وابستگی اور تحریک آزادی کے لیے جدوجہد کے جذبے کو تقویت دی۔
سید علی گیلانی کی پانچویں برسی کے موقع پر آزاد کشمیر سمیت مختلف علاقوں میں تقریبات اور اجتماعات کا انعقاد کیا جا رہا ہے، جن میں مقررین نے ان کی سیاسی جدوجہد، استقامت اور قربانیوں کو خراج عقیدت پیش کیا۔
امیر جماعت اسلامی حافظ نعیم الرحمن نے سید علی گیلانی کی برسی کے موقع پر اپنے بیان میں کہا کہ وہ کشمیری عوام کے دلوں کی آواز تھے اور ان کی گراں قدر خدمات کو ہمیشہ یاد رکھا جائے گا۔
حافظ نعیم الرحمن کا کہنا تھا کہ سید علی گیلانی کی جدوجہد تحریک آزادی کشمیر کے لیے ایک لازوال مشعلِ راہ ہے۔ ان کے مطابق ’’ہم پاکستانی ہیں اور پاکستان ہمارا ہے‘‘ کے نعرے نے کشمیریوں کے حوصلوں کو نئی قوت دی۔
انہوں نے کہا کہ بھارتی قابض فوج اور حکومت کی جانب سے مختلف پابندیوں اور طاقت کے استعمال کے باوجود سید علی گیلانی اپنے مؤقف سے پیچھے نہیں ہٹے اور ان کی ثابت قدمی تحریک آزادی کشمیر کے لیے ایک مثال بن گئی۔
سید علی گیلانی کی برسی کے موقع پر کشمیریوں نے اس عزم کا اظہار کیا کہ ان کے نظریات اور جدوجہد کو یاد رکھتے ہوئے حقِ خودارادیت کے حصول کے لیے اپنی آواز بلند کرتے رہیں گے۔