اسلام آباد: پاکستان پیپلز پارٹی پارلیمنٹرینز کی مرکزی ترجمان شازیہ مری نے آزاد جموں و کشمیر کے عام انتخابات کے حوالے سے اپنے بیان میں کہا ہے کہ آزاد کشمیر کے عوام عام انتخابات میں پاکستان پیپلز پارٹی کو اپنا حقیقی ضامن سمجھتے ہیں، کیونکہ پیپلز پارٹی نے ہمیشہ کشمیری عوام کے حقِ خودارادیت کی بھرپور حمایت کی ہے۔
شازیہ مری نے کہا کہ چیئرمین بلاول بھٹو زرداری کشمیری عوام کے حقوق کے تحفظ کے لیے مکمل طور پر پرعزم ہیں اور مسئلہ کشمیر پاکستان پیپلز پارٹی کے منشور، نظریے اور سیاست کا بنیادی حصہ ہے۔ انہوں نے کہا کہ شہید ذوالفقار علی بھٹو نے اقوام متحدہ میں کشمیر کے مسئلے پر تاریخی اور جراتمندانہ مؤقف اختیار کیا، جبکہ ان کی کشمیر کاز سے وابستگی آج بھی پارٹی کی سیاسی سمت کا تعین کر رہی ہے۔انہوں نے کہا کہ شہید محترمہ بے نظیر بھٹو نے بھی عالمی سطح پر مسئلہ کشمیر کو مؤثر انداز میں اجاگر کیا اور عالمی برادری کی توجہ کشمیری عوام کے حقِ خودارادیت کی جانب مبذول کرائی۔ ان کا کہنا تھا کہ بلاول بھٹو زرداری نوجوان قیادت کے ساتھ کشمیری عوام کی امید بن کر سامنے آئے ہیں اور ان کی قیادت میں پیپلز پارٹی عوامی خدمت اور جمہوری اقدار کے فروغ کے لیے سرگرم عمل ہے۔
مرکزی ترجمان نے کہا کہ گلگت بلتستان میں پاکستان پیپلز پارٹی کی شاندار کامیابی عوام کے اعتماد کا واضح اظہار ہے اور اسی طرح آزاد کشمیر کے عوام بھی ترقی، خوشحالی اور جمہوری استحکام کے لیے تیر کے نشان پر مہر لگا کر پیپلز پارٹی کو کامیاب بنائیں گے۔شازیہ مری نے کہا کہ پاکستان پیپلز پارٹی اقتدار میں آکر آزاد کشمیر میں ترقیاتی منصوبوں کا نیا دور شروع کرے گی، جس سے عوامی فلاح، بہتر طرزِ حکمرانی، روزگار کے نئے مواقع اور معاشی خوشحالی کو فروغ ملے گا۔ انہوں نے کہا کہ پیپلز پارٹی کی سیاست عوامی خدمت، جمہوریت، وفاق کی مضبوطی اور عوامی مسائل کے حل پر مبنی ہے۔انہوں نے مزید کہا کہ کشمیری عوام کا ووٹ پاکستان پیپلز پارٹی کے روشن مستقبل کی ضمانت بنے گا، کیونکہ یہی وہ جماعت ہے جس کی کشمیر کے لیے جدوجہد تاریخ کا روشن باب ہے۔ شازیہ مری نے اس عزم کا اظہار کیا کہ پاکستان پیپلز پارٹی ہر دور میں کشمیر کے عوام کے ساتھ کھڑی رہی ہے، آئندہ بھی ان کے حقوق اور ترقی کے لیے اپنی جدوجہد جاری رکھے گی، اور عوام کا اعتماد پارٹی کو آزاد کشمیر میں ایک نئی تاریخی کامیابی سے ہمکنار کرے گا۔