لاہور ،اسلام آباد اور خیبرپختونخوا میں تیز آندھی جھکڑ کے بعد موسلا دھار بارش

لاہور سمیت پنجاب کے مختلف شہروں، وفاقی دارالحکومت اسلام آباد، خیبرپختونخوا اور آزاد کشمیر میں بارشوں اور تیز ہواؤں کے باعث کئی علاقوں میں بجلی کی فراہمی متاثر ہوئی ہے۔

لاہور میں تیز آندھی اور جھکڑ کے بعد بارش شروع ہو گئی، تیز آندھی کے بعد لاہور کے مختلف علاقوں میں بارش شروع ہو گئی،گلبرگ، مسلم ٹاؤن، لکشمی چوک، قرطبہ چورک، اسلام پورہ، چوبرجی، مال روڈ،نشتر ٹاؤن، گلشن راوی، اقبال ٹاؤن ، سمن آباد میں بارش جاری ہےقذافی سٹیڈیم اور اطراف میں بارش کا سلسلہ جاری ہے،بارش کے باعث پاکستان اور آسٹریلیا کے تیسرے ون ڈے میچ تاخیر کا شکار ہو سکتا ہے بارش اور آندھی کے باعث بجلی کا ترسیلی نظام متاثر ہو گیا،بارش کے باعث لیسکو کے 160سے زائد فیڈرز ٹرپ کر گئے-

وفاقی دارالحکومت اسلام آباد میں بادلوں کی گھن گرج کے ساتھ ہونے والی بارش نے شدید گرمی کا زور توڑ دیا مارگلہ کی پہاڑیوں سمیت شہر بھر میں درختوں اور سڑکوں پر جمی دھول دھل گئی، جس سے قدرتی مناظر مزید دلکش ہوگئے۔

خیبرپختونخوا، آزاد کشمیر، اسلام آباد اور پنجاب کے بعض علاقوں میں علی الصبح سے ہی بارش کا سلسلہ جاری رہا موسلا دھار بارش نے کئی علاقوں میں جل تھل ایک کر دیا جبکہ شہریوں نے گرمی سے وقتی نجات پر اطمینان کا اظہار کیا۔

محکمہ موسمیات کے مطابق اب تک سب سے زیادہ بارش اسلام آباد اور راولپنڈی میں ریکارڈ کی گئی جہاں 50 ملی میٹر سے زائد بارش ہوئی فعال موسمی نظام ملک کے مختلف حصوں پر اثر انداز ہے اور اس کے زیر اثر 5 جون تک مزید بارشوں کا امکان ہے۔

ماہرین کے مطابق حالیہ بارشیں نہ صرف موسم کو خوشگوار بنانے کا سبب بنیں گی بلکہ ڈیموں اور آبی ذخائر میں پانی کی سطح بہتر ہونے میں بھی مددگار ثابت ہوں گی۔