کراچی میں منشیات فروشی کے خلاف پولیس نے بڑی کارروائی کرتے ہوئے مبینہ کوکین ڈیلر انمول عرف پنکی کی نشاندہی پر سچل کے علاقے میں ایک گھر پر چھاپہ مار کر بھاری مقدار میں کوکین اور پیکنگ میٹریل برآمد کر لیا۔
ڈی آئی جی ساؤتھ اسد رضا کے مطابق کارروائی کے دوران گھر سے کوکین کے علاوہ منشیات کی ترسیل کے لیے استعمال ہونے والے خصوصی پیکٹس بھی قبضے میں لیے گئے۔ پولیس نے اس حوالے سے سچل تھانے میں سرکار کی مدعیت میں مقدمہ درج کر لیا ہے جبکہ مزید تحقیقات کا آغاز کر دیا گیا ہے۔پولیس حکام کا کہنا ہے کہ برآمد ہونے والی منشیات انمول عرف پنکی نے مختلف علاقوں میں سپلائی کے لیے گھر میں چھپا رکھی تھی۔ ابتدائی تفتیش کے مطابق ملزمہ ایک منظم نیٹ ورک کے ذریعے شہر کے مختلف حصوں میں کوکین فراہم کرتی رہی ہے۔
ذرائع کے مطابق انمول عرف پنکی کو پہلے ہی قتل کے ایک مقدمے میں گرفتار کیا جا چکا ہے، جبکہ دورانِ تفتیش منشیات کے کاروبار سے متعلق اہم انکشافات سامنے آئے ہیں۔ پولیس کا کہنا ہے کہ ملزمہ نے اپنے بھائیوں کے ساتھ مل کر کوکین سپلائی کا باقاعدہ نیٹ ورک قائم کر رکھا تھا۔
تحقیقات میں یہ بھی انکشاف ہوا ہے کہ انمول عرف پنکی نے مبینہ طور پر انٹرنیٹ کے ذریعے کوکین تیار کرنے کا طریقہ سیکھا اور بعد ازاں اپنے نام سے منشیات کا ایک الگ برانڈ بھی متعارف کرایا۔ پولیس کے مطابق ملزمہ نے ابتدا میں اپنے سابق شوہر کے ساتھ مل کر یہ کاروبار شروع کیا، جو پیشے کے اعتبار سے وکیل تھا اور مبینہ طور پر ایک بین الاقوامی کوکین گینگ سے منسلک رہا ہے۔قانون نافذ کرنے والے اداروں کا کہنا ہے کہ نیٹ ورک سے وابستہ دیگر افراد کی گرفتاری کے لیے بھی چھاپے مارے جا رہے ہیں جبکہ منشیات سپلائی چین کے مزید روابط کا سراغ لگانے کی کوشش جاری ہے