تہران: ایرانی پاسداران انقلاب کے کمانڈر میجر جنرل احمد وحیدی نے کہا ہے کہ امریکی افواج کے حملوں میں جاں بحق ہونے والے ایرانی شہریوں کا خون رائیگاں نہیں جائے گا اور اس کا حساب لیا جائے گا۔
ایرانی میڈیا کے مطابق احمد وحیدی نے جنوبی ایران میں شادی کی ایک تقریب پر مبینہ امریکی میزائل حملے کی شدید مذمت کرتے ہوئے کہا کہ خوشی کی تقریب میں شریک معصوم خواتین، مردوں اور بچوں کو نشانہ بنانا امریکی دشمنی اور بے بسی کو ظاہر کرتا ہے۔
احمد وحیدی نے کہا کہ ایرانی شہریوں کے خلاف اس نوعیت کی کارروائیاں قوم کے عزم کو متزلزل نہیں کرسکتیں۔ ایرانی عوام مشکل حالات کے باوجود اپنی مزاحمت جاری رکھیں گے اور دشمن کے دباؤ کے سامنے جھکنے کے بجائے مزید مضبوط عزم کے ساتھ کھڑے ہوں گے۔
رپورٹس کے مطابق جنوبی ایران میں شادی کی تقریب کو میزائل حملے کا نشانہ بنائے جانے کے بعد متعدد شہریوں کے جاں بحق اور کئی افراد کے زخمی ہونے کی اطلاعات سامنے آئی ہیں۔ واقعے کے بعد ایرانی حلقوں میں شدید غم و غصہ پایا جاتا ہے جبکہ حکام نے شہریوں کو نشانہ بنائے جانے کے مبینہ واقعے پر سخت ردعمل کا اظہار کیا ہے۔
دوسری جانب امریکی فوج کا مؤقف ہے کہ اس کی کارروائیوں میں ایرانی فوجی تنصیبات اور دیگر عسکری اہداف کو نشانہ بنایا گیا، جبکہ امریکی حکام نے شہریوں کو دانستہ طور پر نشانہ بنانے کے الزام کی تردید کی ہے۔
ایرانی کمانڈر نے واضح کیا کہ شہریوں کی ہلاکت کے واقعات کو نظرانداز نہیں کیا جائے گا۔ ان کا کہنا تھا کہ ایرانی قوم اپنے جاں بحق ہونے والے شہریوں کے خون کو فراموش نہیں کرے گی اور ملک کے خلاف ہونے والی کارروائیوں کا جواب دینے کے لیے قومی عزم برقرار ہے۔
جنوبی ایران میں شادی کی تقریب پر مبینہ امریکی حملے نے خطے میں جاری کشیدگی اور فوجی کارروائیوں کے دوران شہری آبادی کے تحفظ سے متعلق خدشات کو ایک بار پھر نمایاں کردیا ہے۔ تاہم واقعے میں جانی نقصان کی حتمی تعداد کے حوالے سے متعلقہ حکام کی مزید تفصیلات سامنے آنا باقی ہیں۔