بنوں میں سیکیورٹی فورسز کی جانب سے جاری انٹیلی جنس بنیادوں پر کیے جانے والے آپریشن میں اب تک 32 دہشت گردوں کی ہلاکت کی اطلاع ہے، جبکہ علاقے سے بڑی مقدار میں اسلحہ، ایک ڈرون اور دھماکا خیز مواد بھی برآمد کیا گیا ہے۔
ابتدائی اطلاعات کے مطابق سیکیورٹی فورسز نے آپریشن کے دوران مقامی طور پر تیار کیے گئے پانچ دیسی ساختہ بم (آئی ای ڈیز)بروقت تلاش کر کے ناکارہ بنا دیے، جس سے ممکنہ بڑے جانی نقصان کو ٹال دیا گیا۔
ذرائع کے مطابق کارروائی کے دوران ایک کواڈ کاپٹر (ڈرون)، ایک اینٹی ڈرون گن، تین سب مشین گنز (ایس ایم جیز) اور ایک ایم فور رائفل بھی قبضے میں لی گئی۔ اس کے علاوہ متعدد مشتبہ افراد کو گرفتار کر کے مزید تفتیش کے لیے حراست میں لے لیا گیا ہے۔
سیکیورٹی ذرائع کا کہنا ہے کہ آپریشن کا مقصد علاقے میں موجود دہشت گردوں کے نیٹ ورک کا خاتمہ اور امن و امان کی بحالی ہے۔ فورسز مرحلہ وار مختلف مقامات کی تلاشی لے رہی ہیں تاکہ کسی بھی ممکنہ خطرے کو ختم کیا جا سکے۔
حکام کے مطابق علاقے میں سرچ اینڈ کلیئرنس آپریشن تاحال جاری ہے اور دہشت گردوں کے ممکنہ ٹھکانوں کی مکمل چھان بین کی جا رہی ہے۔ آپریشن مکمل ہونے کے بعد مزید تفصیلات جاری کیے جانے کا امکان ہے۔
سیکیورٹی فورسز نے اس عزم کا اعادہ کیا ہے کہ ملک سے دہشت گردی کے خاتمے اور شہریوں کے تحفظ کے لیے ایسی کارروائیاں بلا تعطل جاری رہیں گی۔
بنوں میں سیکیورٹی فورسز کا آپریشن، 32 دہشت گرد ہلاک، اسلحہ اور ڈرون برآمد
