شاہدرہ ٹاؤن میں پیش آنے والے تیزاب گردی کے سنگین واقعے میں پولیس نے بروقت کارروائی کرتے ہوئے مرکزی ملزم یاسر محمود کو گرفتار کر لیا، ملزم کے خلاف تھانہ شاہدرہ ٹاؤن میں تیزاب گردی کی دفعات کے تحت مقدمہ درج کر لیا گیا ہے۔
پولیس ترجمان کے مطابق ملزم نے ایک پان شاپ پر موجود دو افراد پر تیزاب پھینکا، جس کے نتیجے میں 26 سالہ شفیق شدید جھلس کر زخمی ہو گیا، جبکہ 17 سالہ اسلے جان کے بازو پر بھی تیزاب کے باعث گہرے زخم آئے واقعے کے فوراً بعد دونوں متاثرہ افراد کو قریبی ہسپتال منتقل کیا گیا جہاں انہیں بروقت طبی امداد فراہم کی گئی۔
ترجمان کا کہنا ہے کہ پولیس نے جدید ٹیکنالوجی اور دستیاب شواہد کی مدد سے ملزم کو ٹریس کر کے حراست میں لیا، گرفتار ملزم سے تفتیش کا عمل جاری ہے، جس دوران مزید اہم انکشافات متوقع ہیں۔
ڈی آئی جی آپریشنز کے ترجمان نے واضح کیا ہے کہ تیزاب گردی جیسے گھناؤنے جرائم میں ملوث عناصر کے خلاف قانون کے مطابق سخت کارروائی عمل میں لائی جائے گی اور متاثرہ شہریوں کو ہر صورت انصاف کی فراہمی یقینی بنائی جائے گی۔